أميرة أحمد
“أنا لسة في عز شبابي” .. جملة دايما بتتكرر من أي حد قرب يوصل لسن الـ 30، وكأنه بيبعد عن نفسه تهمة أنه كبر خلاص وعجز وراحت عليه العشرينات بشبابها وعفويتها.
والحقيقة إن فعلا الوصول للـ30 بيغير كتير في صحة أي شخص، وبيبدأ يشوف أثار كل عاداته الصحية اللي مارسها طول السنين اللي فاتت بتظهر واحدة ورا التانية.
وعلشان كدا جبنالك مجموعة من العادات الصحية اللي لازم تحافظ عليها بمجرد وصولك لسن التلاتين واللي هتخلي صحتك وجسمك وروحك لسة في “عز شبابهم”.
1- الزيارة الدورية للطبيب:
في السن دا محتاج تبدأ تركز على الفحوصات الطبية، وأولها صورة الدم، ومخزون الحديد، وكمان الغدة، والنظر والأنف والأذن، وتبدأ تطمن إن كل نتايجك سليمة، والأفضل إنك تتابع مع دكتور بشكل ثابت منتظم كل كام شهر .
2- تناول الفيتامينات:
من أهم الفيتامينات اللي أكد الأطباء احتياج الجسم ليها بعد سن الـ30 هي (فيتامين E و ألف و سي و حمض الفوليك والحديد والكالسيوم) ، وكل دا ممكن الحصول عليه من الأكل الطبيعي زي السبانخ والأسماك والفاصوليا والكيوي والشاي الأخضر، وكمان ممكن على هيئة كبسولات كمكملات عذائية .
3- النوم المنتظم :
والمقصود هنا إن الجسم يتعود على دورة نوم واحدة بالليل والنهار لتجنب خطر الإفراط في النوم، فخليك حريص على النوم والصحيان في نفس المواعيد ومتستسلمش للنوم ساعات زيادة أيام الإجازات.
4- الأكل الصحي :
بعد سن الثلاثين، بتقل عملية التمثيل الغذائي، وبالتالي بيقل الحرق وبيخلي الحفاظ على الوزن أصعب من أي فترة فاتت، وكتير من الدراسات أكدت أنك في العمر دا محتاج تقلل وزنك وأول خطوة هي الأكل الصحي المتوازن.
5- تعلم الطبخ:
لو كنتوا من الأشخاص اللي لسة مش بتعرف تطبخ، فدا الوقت اللي محتاجين تعيدوا التفكير فيه، لإن تعلم الطبخ في المنزل وخاصة الأكل الصحي من أسرع الطرق الصحية السليمة اللي تضمن تقليل الاعتماد على “الفاست فود” الغنية بالصوديوم، والزيت، والسعرات الحرارية .
6- الجيم والمشي:
التنويع بين الذهاب للجيم و الاعتماد على المشي السريع مطلوب جدا في الفترة دي علشان تحافظ على صحتك وجسمك، فممكن تخلي الجيم مرة واحدة أسبوعيا لكن لازم تمشي ما لايقل عن 5 أيام لمدة 20 دقيقة متواصلة .
