همسة السيد
الحُسين بيتميز بأجواء رمضانية مختلفة، وروحانيات صعب إنك تشعُر بيها وتلاقيها في أي مكان آخر، من آذان المغرب لحد السحور، أنت في حضرة روحانيات رمضانية تراثية مختارة.
بعد فطارك اللذيذ وسط لمة الأهل والأصحاب على سفرة رمضان، تقدر تقضي سهرة رمضانية لطيفة وتحّلي بعد الفطار، بأحلى كنافة، قطايف، رز باللبن، بليلة أو حتى آيس كريم.
كل الحلويات اللذيذه دي هتلاقيها عند “المالكي” أول ما تدخل الحسين من اتجاه المسجد أسفل فندق الحُسين.
قعدات خارجية تتفرج فيها عاللي رايح وجاي، وقعدات داخلية.. تواشيح شباب بيعزفوا عود في كل ركن من المالكي، بياعين سبح بيعدوا عليك.
ولو أنت مش من محبي الحلويات الشرقية، فهتلاقي عند المالكي تسالي هتبسطك جدًا، هيقدمولك طبق مشّكل من اللب السوري والسوبر والأبيض، والفول السوداني والكاجو والفسدق، وحبة حاجات آخر جمال وطعامة.
استمتع بالأجواء الرمضانية اللي صعب أنك تحسها في أي مكان تاني غير مصر، كل سنة وكلنا بخير.
