“القبيحة ست جيرانها”.. دا مثل شعبي قديم كان بيتقال زمان على سبيل التندر والضحك لكن للأسف الشديد دلوقتي بقي واقع أكتر من أنه مثل، واقع بقينا عايشين فيه وبتقابلنا شخصيات كتيرة بينطبق عليها المثل لدرجة أن تقريبا كدا في حياة كل واحد منا شخص أو اكتر بينطبق عليه المثل دا..
اللي يزعل بقى أن حال الناس اتغير في وقتنا الحاضر عن الماضي فبقت ست جيرانها أو سيد جيرانه في الوقت اللي كان في الماضي بيكون صمام الأمن للي حواليه ودا لأنه كان بيتميز بالأخلاق والقيم..
ودا لما كان المجتمع متماسك وكانت النخوة والشهامة والتسامح أصل الناس، كانت المرؤة والشجاعة والأخلاق هي الأصل.. وكان احترام الكبير واجب، كان الحياء أصل رجالها قبل نسائها وصغارها، واللسان الحلو والكلمة الطيبة هي اللي تخلي الناس تعمل لصاحبها ألف حساب..
لكن تعالوا شوفوا دلوقتي ايه اللي حصل في مجتمعنا، للأسف الشديد ضاعت الأخلاق وضاعت معاها القيم والمبادئ بقينا في مجتمع بيعمل الناس فيه ألف حساب للي يخوفوا منه ومن لسانه ومن شره مش من اللي بيحبوه..
للأسف ضاعت النخوة والمرؤة وبقينا في مجتمع تاهت فيه عاداتنا وتقاليدنا واترسخ بدالهم في عقول كتير من الناس الفوضى وعدم احترام الكبير وقذارة اللسان، عقول فاضية من الدين والأخلاق والثقافة، سادت شريعة الغاب والضواري كل اللي يهمها المنفعة السيطرة..
ولو فكرنا شويتين وحاولنا نعرف السبب في اختلاف أحوالنا، وازاي اتغيرت المفاهيم وانهارت القيم والمعايير الاجتماعية واتبدلت بمفاهيم ساقطة بتسيء للفرد والمجتمع وكل دا تحت مسمى التقدم أو التطور، ولكن في الواقع مش أكتر من فوضى أخلاقية وتسيب اجتماعي فاق كل تصور وحد..
عايزين نبقى ناس صريحة مع نفسنا قبل ما نكون مع غيرنا، أيوة لازم نعترف أن احنا بنعيش أزمة أخلاقية، السائد هنا الكذب والنفاق والرياء وغياب الأخلاق والعنف المجتمعي..
عايزكم تفهموا كلامي صح انا مش بطالبكم أننا نرجع بالزمن للوراء ولا يعيش شبابنا زي ما عاش آباءنا وأجدادنا في الماضي، فلكل زمان رجاله ولكن كل اللي بتمناه واطلبه هو التمسك بالقيم الإنسانية الجميلة اللي آمنا واتمسكنا بيها وحمتنا من فقدان إنسانيتنا..
إياكم تعيبوا على الزمن وترموا عليه سبب التغيير دا، خليكم واضحين مع نفسكوا واعترفوا أن العيب فينا، زي ما قال الشاعر نعيب زماننا والعيب فينا.. وما لزماننا عيب سوانا، والله ياجماعة الأخلاق هي أساس الشعوب وتاجها ولو اتدهورت الأخلاق أو حصل فيها أي خلل ادهور المجتمع كله.
مش كدا ولا اييييييييه؟
بقلم
عمرو مرزوق
