أهلنا زمان قالوا القفة أم ودنين يشيلوها اتنين، كمان قالوا أيد لوحدها ماتسقفش، الكلام دا بقوله عشان كلنا شايفين حوالينا خوف وقلق صاب مجتمعنا نتيجة ارتفاع أسعار جنوني يوم بعد يوم، صدقوني حاجة توجع القلب لما تشوف حد محتاج والدنيا ضاقت في وشه خلاص وهو مافيش حاجة في أيده قادر يعملها، في وقت الأزمات والغلاء لازم تظهر فكرى التكافل بين الناس ودا معناه أننا نحاول على قدر المستطاع أننا نمد أيد العون والمساعدة للي محتاجينها وما نبخلش عليهم.
كل إنسان من حقه أنه يعيش في مجتمعه عيشة كريمة تليق بآدميته، وتتفق مع كرامته الإنسانية ودا مش هيحصل إلا لو كان قلبنا على قلب بعض، مش سهل أبدا علينا أن يكون حد وسطنا جعان أو مريض بيقاسي الألم ومش لاقي العلاج أو قهرة الحرمان وبتذله الحاجة في الوقت اللي فيه ناس معاها بزيادة، المسألة مش إجبار يا جماعة المسألة مجرد إحساس بغيرك.
تعالوا نتفق مع بعض اتفاق كلنا أننا نحاول نساعد أكتر على اد ما نقدر، ياريت ماتقولوش ماهو احنا بنطلع زكاة وصدقات بنساعد بيها الفقراء والمحتاجين على أعباء الحياة والغلاء، لأني هرد عليكم واقولكم بذمتكم دي هتكون كافية في الظروف الاقتصادية الصعبة اللي احنا فيها دلوقتي؟، عشان كدا هيبقي الأمل في إنقاذ ما يمكن إنقاذه هو التعاون والتكافل.
تعالوا نحاول نعملها على اد ما نقدر زي مثلا:
– تسديد مصاريف المدارس للمعسرين وكمان نشتري الشنط المدرسية ومستلزماتها من كتب وكراسات وأقلام ويتم توزيعها على أبناء الفقراء.
– شنطة حلوة كدا فيها شوية حاجات من اللي بيحتاجها كل بيت الزيت، السكر، السمن، وارز وشاي وخلافه.
– نشوف ديون العائلات المتعففة ونحاول نسدد اللي نقدر عليه.
– فيه ناس كتير بتسحب حاجات من أصحاب البقالات والصيدليات والمخابز وحتى الخضار على أساس أنها تدفع بعدين زي ما بتقول بالبلدي كدا على النوتة ومع الظروف الصعبة دي كتير بتتراكم عليهم الديون ايه رأيكم لو رحنا للبقال أو الخضري وسقطنا حسابهم ودفعنا اللي نقدر عليه.
– خدوا فكرة كمان.. احنا نقدر نتبرع للمرضى المحتاجين واللي مش قادرين على شراء الأدوية والعلاجات، ودا من خلال دفع ثمن الدواء أو المستشفى اللي يتعالجوا فيها أو شراء المستلزمات الطبية اللي يحتاجوها.
– مساعدات عينية كدا بطريقة جميلة زي هدوم تسترهم وبطاطين في الشتاء لحماية الفقراء في الشوارع من البرد.
ياجماعة خلو بالكم أن أكبر المصاعب بسبب التعاون والمشاركة بتبقي أقل قسوة وبيمكنا نتغلب عليها، عشان كدا ربنا خلقنا عشان نكون كيان إنساني متواصل مع بعضه بيرحم بعضه..
في القرآن (وَالَّذِينَ فِي أَمْوَالِهِمْ حَقٌّ مَعْلُومٌ * لِلسَّائِلِ وَالْمَحْرُومِ ) المعارج أية 24
وفي الكتاب المقدس
أيها ٱلْأَحِبَّاءُ، إِنْ كَانَ ٱللهُ قَدْ أَحَبَّنَا هَكَذَا، يَنْبَغِي لَنَا أَيْضًا أَنْ يُحِبَّ بَعْضُنَا بَعْضًا.
لازم نفهم أن التكافل والتعاون من أهم الأسس والأركان اللي بيقوم عليها بنيان مجتمع سليم
وعشان يحصل فدا محتاج تعاون الكثير مننا فيه مقولة بتقول (نحلة واحدة لا تجني العسل)، الفقر مش عيب إنما العيب أننا نبقى ساكتين ونتفرج عليه واحنا في أيدينا الحل..
مش كدا ولا اييييييييييييه؟
بقلم
عمرو مرزوق
