ولو سألوك عن أفضل الأعمال الإنسانية فَحدثهم عن جبر الخواطر.
متهيألي أن ما فيش صفة إنسانية أجمل من جبر الخواطر وهي حاجة على أد ما هي جميلة وسهلة على أد ما هي مش كل واحد يقدر يعملها..
متفتكروش أبدا أنها صعبة بالعكس دي بسيطة جدا وربنا خلقها جوانا وحببنا فيها عشان كدا دعت ليها الديانات السماوية كلها.. وعلى فكرة لو مكانتش بتفرق كتير مع المخلوقات مكنش ربنا خلاها صدقة.
عارفين دي ممكن تاخدنا من سابع أرض وترفعنا لسابع سما، أوعى تفتكر أن جبر الخواطر في لحظة الضعف بتتنسي ابدا..
لأن أصعب الفترات اللي بنمر بيها في حياتنا هي لحظات كسر الخاطر.. بتموتنا بالبطيء وتخلي أرواحنا هشة تكسر اللي جوانا، يعني بنبقي وقتها في قمة الضعف والحزن وأشد الاحتياج للي يلملم جروحنا ويجبر كسر خاطرنا وتلاقيه في عز الضلمة والشدة يظهر لك ويطبطب عليك بكلمة حلوة وبسمة ترجعلك الأمل وفي الوقت نفسه يكون لك السند.
عشان كدا لازم نحاول نتعلم ازاي نقدر نكون لبعض ومش مجرد كلمة طيبة تهون على كل قلب مكسور ونفس تعيسة، لازم نتعلم فن جبر الخواطر عشان نقدر نرسم بسمة جميلة بدل الحزن والوجع.
جبر الخاطر يعني لما تلاقي حد زعلان تروح تطيب قلبه وتقوله مش قادر اشوفك زعلان عشان أنت غالي، تروح له أنت بنفسك إياك تستناه يجي لك لأن كل دقيقة نزيف مشاعره بيزيد، اتعلم تبقى زي المية الباردة اللي بتروي تايه في الصحرا، أصل العطشان مش عاوز وعظ عاوز بس شوية ميه ترويه، والمجروح مش عاوز اللي يشخط فيه، عاوز حصن دافي يرجع له ثقته في نفسه وفي الناس الحلوة، ح تلاقي ضحكته عليت لفوق وضحكتك عليت أكتر منه.
جبر الخاطر يعني على قد ما تقدر تحاول ما تهملش طلب حد، ترد على الكل، تسمع الكل بتواضع، جبر الخاطر يعني لما حد يقصدك في خدمة توريله اهتمامك الكبير، وتعتبر مشكلته هي مشكلتك، وحتى لو مش في أيدك الحل، كفاية أنك ترد بلطف وتنصحه بإخلاص يعمل ايه.
جبر الخاطر يعني تحترم الصغير وتصبر عليه، وتقف للكبير و تقدر سنه و تعبه، وتوقر الناس مهما كان مستواهم، هو صحيح “جبر الخواطر على الله”، بس من خلالنا أنت وأنا، احنا مجرد أسباب، الدوا رباني صحيح بس احنا اللي بناخده ونداوي به المجروحين والمحرومين.
لازم تعرف دايما أن الحنية ورقة القلب فيك مزروعة جواك، حتى لو تراب قسوة الحياة غطى جزء منها، في ثواني الحنية هتنفضه من عليك ويظهر معدنك الأصيل الطيب اللي ربنا خلقك عليه، بس أنت اللي قسوة الأيام اللي بتسرقك.
رقة القلب نعمة.. طيب الكلام نعمة.. اللسان الجميل نعمة.. عشان كدا لازم تفكر ألف مرة قبل كل كلمة تنطق بها، وأكبر نعمة أنك ترفض قول أو فعل أي شي يمكن أنه يسبب حزن الشخص اللي قدامك ولو بقدر بسيط، والله دي أكبر نعمة.. ويابخت اللي ربنا نوله النعمة دي.
مش يمكن جبرك لخاطر شخص بيحبه ربنا يكون سبب أن ربنا يحبك، واللي هتجبر بخاطره إنهاردة ممكن أوي بكرة يجبر بخاطرك أو بخاطر حد بتحبه، باختصار كدا جبر الخواطر نعمة لازم تحرص عليها.
الرسول الحبيب جبر بخاطر طفل صغير عمره 3 سنين لما مات عصفوره فضل يواسيه ويلاعبه، لحد ما نسى الطفل حزنه، وتبسم الصبي الصغير وفرح لكلام رسول الله.
المسيح عليه السلام جبر بخاطر المرأة الخاطية اللي كانت عايزة تتوب بس الناس احتقرتها ورفضت توبتها وحاولوا يرجموها، لكن المسيح جبر بخاطرها لما حس منها التوبة وقال فليرجمها من كان منكم بلا خطيئة، وكانت النتيجة أنها تابت على أيد المسيح ودخلت في خدمته.
وزي ماقلنا أن جبر الخواطر نعمة من ربنا بيختص بيها عباد له، تعالوا نشوف كمان كام موقف كدا يورينا أن جبر الخواطر أد ايه حلو.
لاول حكاية هي حكاية فاطمة مع شباب جامعة MUST اللي لاقوها أد ايه كانوا في كافيه في أكتوبر وشافوا أمل البنت الصغيره اللي بتتسول بكل براءة وابتسامة جميلة وفي نفس الوقت بكرامة، وبعدها الشباب قعدوا يحكوا معاها عن حياتها وأد ايه هي نفسها تبقي محبوبة وتبقي زي باقي البنات اللي في سنها، يكون لها أهل وأصحاب وتعمل عيد ميلاد وتعزم كل أحبابها، خصوصا أن معاده قرب ونفسها فِ تورتة وتطفي الشمع، وفعلاً عملوا ليها مفأجاة يوم عيد ميلادها وجبروا بخاطرها وجابوا تورتة وهدايا وجم واحتفلوا معاها.
نشوف حكاية تانية..
مجموعة من الشباب اتفقوا مع بعض وكونوا فريق إنقاذ صغير، وخلوا عندهم مبدأ ياريت نرسم البسمة والسعادة على وش إنسان فقد الأمل في زحمة الناس ولو ليوم، وبعدين كونوا مع أصدقائهم وأقاربهم وجيرانهم جمعية صغيرة، تقوم برعاية المشردين بقدر المستطاع من توفير أكل وإقامة وعلاج حقيقي بإمكانيات محدودة، لكن بارقة أمل بتقول إن لسه الدنيا بخير.
الكلام دا مش للإنسان بس، لا دا لكل مخلوقات الله، اتعلم أنك تجبر بخاطر حيوان بريء يجبر الله خاطرك، اتعلم ماتأذيش حيوان ولا تضربه ولو قدرت أكله هو مش طماع لقمتين بس تكفيه وشوية مية.
تعالوا نتعلم ازاي نجبر الخواطر بأبسط الطرق
بكلمة جميلة، وابتسامة هادية
★ اتعلم لو دخلت مطعم وقدم لك الجرسون الأكل، أنك لازم تبتسم في وشه واشكره كمان.
★ لما تلاقي شخص فقير يبيع أي سلعة بسعر رخيص، اشتري منه من غير فصال وزود الفلوس حبتين، كل دا وأنت مبتسم.
★ ساعد المحتاج دايما وخليك حاضر دايما وقت الزنقة، واعرف أن الاحتياج مش فلوس وبس، الاحتياج أمان.. حب، اتعلم ازاي وامتر تساعد ودا في حد ذاته جبر خاطر، واعرف واتأكد أن ربنا هيرده ليك في وقت حاجتك.
وحالات تانية كتيرة محتاجة جبر الخواطر، بس اتعلم ازاي تعرف وتقدر تنجز باللطف اللي مانقدرش عليه بالقوة.
ومافيش في الآخر إلا إننا نقول:
اللهم جبرًا يتعجب منه أهل السماوات والأرض.
اللهم صبرا.. اللهم جبرا.. اللهم قوة.
بقلم
عمرو مرزوق
