ما كدبش عمنا نجيب محفوظ لما قال إن القراءة هي التنفس الثاني للإنسان، كل معرض كتاب وأنتم بخير، وكل معرض وأنتم فرحانين يا محبين ويا عشاق القراءة..
وتعدي الأيام ويرجع لنا معرض القاهرة الدولي للكتاب في دورته الجديدة الـ 55 تحت شعار “نصنع المعرفة.. نصون الكلمة”، وتم اختيار اسم عالم المصريات الدكتور سليم حسن عشان يكون شخصية المعرض وكمان تم اختيار اسم كاتب الأطفال الكبير يعقوب الشارونى عشان يكون شخصية معرض الطفل..
جميل اووووي الاختيار دا ومن وجهة نظري أنه منتهي التوفيق في الجمع بينهم، دكتور سليم حسن عالم المصريات والآثار الشهير وأعماله المهمة في التنقيب والكشوفات الثرية العظيمة وأول عالم آثار مصري يقوم بالتنقيب في منطقة الجيزة والأهرامات وسقارة وأبو الهول واللي عرفنا التاريخ المصري والحضاري وصاحب موسوعة مصر القديمة غير مؤلفات كتيرة له في مجاله ومن هنا كان لازم يتعرف عليه الشباب..
أما الكاتب الكبير يعقوب الشاروني فهو الكاتب والصحفي المصري رائد من رواد أدب الأطفال في مصر والعالم العربي ، كتب أكتر من 400 كتاب للأطفال وكان بيكتب باب في جريدة الأهرام تحت عنوان ألف حكاية وحكاية..
فكان جميل اوووي أننا نحاول نوصل لشبابنا وأطفالنا الحكاية الجميلة والمعلومة البسيطة وكمان نوصل لهم عظمة تاريخنا ونبتدي معاهم الخطوة الأولى في مشوار الألف ميل في مجال الثقافة والمعرفة فنوسع مداركهم ونعمل على زرع بذرة حب القراءة والمعرفة..
ونرجع من تاني حب الكتاب الورقي ونعلمهم ازاي يحبوا ملمس وريحه الورق اللي احنا اتربينا واتعودنا عليها وكمان صوت صفحات الكتب وأنت ماسك الكتاب وبتقرأ وتقلب صفحاتة صفحة.. صفحة..
عايزين نرجع حب الكتاب الورقي من تاني مش هننكر أن معظمنا بقى ييقبل على القراءة على الإلكترونية ولو دورنا في الموبايلات وأجهزة الكمبيوتر واللاب هتلاقي أن فيها كتب كتيرة بنقرأها..
حقيقي بنقدر نقرأ اللي عايزينه لكن مش بنفس متعة الكتاب الورقي، فكانت النتيجة أن محصلة قرايتنا قلت كتير عن السابق، عشان كدا هتلاقي كل محبين الكتب الورقية بيستنوا معرض القاهرة الدولي للكتاب اللي بيكون بالنسبة لهم عيد بيستنوه من السنة للسنة..
ودا بالإضافة إلى فعاليات ثقافية اللي بتضم لقاءات مع مبدعين وكتاب ومفكرين وفنانين ورموز وقامات مصرية عربية وعالمية ودا لتعزيز دور الثقافة في بناء المستقبل اللي بنتطلع ليه..
وزي مابدات بمقولة لأديبنا الكبير هختم برضه بمقولة للعملاق عباس العقاد يقول لك المرشدون: “اقرأ ما ينفعك” ولكني أقول: “بل انتفع بما تقرأ”، عشان كدا نصيحة مني أننا نحرص على اختيار اللي هنقرأه ونحرص كمان أننا نعلم ولادنا يعرفوا يختاروا اللي هيقروه وينتفعوا منه.. مش كدا ولا اييييييييه؟
بقلم
عمرو مرزوق
