معلش يا عمنا صلاح المرة دي أنا مختلف معاك لما قلت قالوا الشقيق بيمص دم الشقيق، لا ياعمنا أنا بقى بقول أيد الشقيق اتخلقت عشان تسند وقت الضيق، وألف باء الأخوة التعاون والتراحم والوقوف جمب شقيقك في شدته وتكون له الضهر والسند، بذمتكم ايه قيمة الأخوة لو ماوقفتش جمب أخوك وتنصره في شدتة وترحمه وقت ضعفه؟! وتساعده على تجاوز أحزانه.
حاجة بجد توجع القلب من كام يوم بس كان فيه زلزال ضرب مدينة مراكش يوم الجمعة بقوة 6.8 درجة على مقياس ريختر، وبعدها بدقايق وقعت هزة أرضية تانية أدت لمقتل أكثر من 2800 شخص وإصابة ما لا يقل عن 3000.
وانتشرت على منصات التواصل الاجتماعي مقاطع مصورة وفيديوهات وصور صادمة عن قوته والأضرار والخساير المادية والبشرية اللي كان سببها، يا الله كل الأحداث المؤلمة دي واللي شفناها على مواقع التواصل الاجتماعي في محاولة لتصوير تأثيرات الكوارث من انهيارات كبيرة للأبنية وسقوطها فوق روس سكانها وسط صدمة الأهالي.
موت ودم وقتلى بتقطع قلوبنا من ناحية ومن ناحية تانية صورة أخف قتامة بس برضه بتوجع أوي وهي صور الناجين اللي بيجروا في الشوارع في منهم اللي جريوا من الخوف ومنهم اللي جريوا بعد سقوط بيوتهم اتشردوا في الشوارع.. دمار كبير في كل مكان فيديوهات وصور ومشاهد إنسانية بتوجع بجد.
وتيجي بعدها المصيبة اللي تزيد القلب وجع كلنا شفنا لقطات لآثار الدمار اللي حصل بمدينة درنة الليبية بسبب إعصار دانيال اللي اتسبب في فيضان كان نتيجته ضحايا ومفقودين بينهم مصريون، يا الله اد ايه قلوبنا اتوجعت لما شوفنا صور الفيضانات اللي حصلت لما انهار السدين الرئيسين على نهر وادي درنة الصغير واتسبب في انزلاقات طينية ضخمة دمرت جسور وجرفت كتير من المباني مع سكانها.
ووجعنا أكتر لما عرفنا أن عدد الأشخاص الضحايا في شرق ليبيا بسبب الفيضانات مابين جريح ومفقود وصل تقريبا لأكتر من عشرة آلاف مفقود دا غير عدد الوفيات اللي أكتر من 2700 شخص، ودا اللي أعلنه الصليب الأحمر عن حصيلة الضحايا.
أد ايه الفقد كلمة صعبة جدا بتوجع أووي خصوصا لما تشوف اللي قصادك لا حول ولا قوة له، فقد أرواح.. فقد مأوى.. فقد أمان.. أسر كتير فقدت ناس منها بالموت.. أطفال كتير اتشردوا واتيتموا.. حتى عمليات فرق الإنقاذ اللي بتواصل عملها وسط ظروف صعبة، واللي يرعب اكتر الأرقام اللي كل شوية بتعلن عن ارتفاع أعداد الضحايا.
أنا وكل الشعب المصري بنقدم خالص مواساتنا وتعازينا وبندعي ربنا أنه يتغمد الضحايا بواسع رحمته، وأن يربط على قلوب أهلهم وذويهم، وأن يرزقهم الصبر في مصابهم الجلل.
اللي عايز أقوله أن لازم نبقى إيجابين ومانكتفيش بمتابعة الأحداث والبكا ومصمصة الشفايف، لازم يكون فيه دور إيجابي رسمي وأهالي وشخصي، فقواتنا المسلحة قامت بتقديم كافة أشكال الدعم الإنساني، من أطقم إغاثة ومعدات إنقاذ ومعسكرات إيواء للمتضررين ودا بيتم بالتعاون والتنسيق مع الأجهزة والمؤسسات الليبية والمغربية.
كمان فيه تحرك شعبي من خلال منظمات أهلية وبكدا بقى التحرك رسمي وشعبي في وقت واحد لازم ندور على طريقة تتبرع بيها ولو بالقليل لأنهم في حاجة ماسة لعلاج ومأوى وأكل ولبس، لو مش ف أيدك حاجة كفاية تقدر تصلي عليهم صلاة الغائب وتترحم عليهم، خليك إيجابي وأرحم عشان ترحم.
المواقف دي صعبة جدا والأزمة شديدة فلازم نتعاون، القرآن بيقول {تعاونوا على البر و التقوى و لا تعاونوا على الإثم و العدوان }(سورة المائدة / الآية 2).
الكتاب المقدس بيقول (مُهْتَمِّينَ بَعْضُكُمْ لِبَعْضٍ ٱهْتِمَامًا وَاحِدًا، غَيْرَ مُهْتَمِّينَ بِٱلْأُمُورِ ٱلْعَالِيَةِ بَلْ مُنْقَادِينَ إِلَى ٱلْمُتَّضِعِينَ. لَا تَكُونُوا حُكَمَاءَ عِنْدَ أَنْفُسِكُمْ)
رُومِيَةَ ١٢:١٦
وانبي ياجماعة خلينا نتفق على حاجة وهي إن اجتماع السواعد بيبني الوطن واجتماع القلوب بيخفف المحن.
مش كدا ولا اييييه؟
بقلم
عمرو مرزوق
