غلط اللي فاهم أن شهر رمضان بس صيام عن الأكل والشرب. اللي لازم نعرفه كمان أنه صيام عن كل حاجة وحشة؛ عن الغضب، وعن الكذب، وعن إيذاء الناس. رمضان فرصة عشان نصلح من نفسنا ونتعلم الصبر والتسامح وحب الخير للناس زي ما بتحبه لنفسك.
النبي صلى الله عليه وسلم قال: “إنما بُعثت لأتمم مكارم الأخلاق”، يعني الدين كله قام عشان يكمل ويجمل أخلاق الناس. لازم نفهم أن الصيام جاء عشان يعلمنا نتحكم في نفسنا وشهواتنا، ويهذب من أخلاقنا، ويزرع في قلوبنا الرحمة. إحنا لما بنجوع ونعطش بنحس بالمحروم، فنتعلم الرحمة والعطف.
تعالوا نعيش رمضان صح بلا مسلسلات بلا برامج نميمة. تعالوا نتسابق في فعل الخير، ونزود التسامح، ونوصل الرحم. تعالوا نزور الأقارب وأصحابنا، تعالوا نتدبر في حكمة الصيام. وكل ده جزء من الأخلاق؛ إننا نعدل من أخلاقنا ونشوف اللي ناقصنا ونكمله. تعالوا نقرب من ربنا أكتر. عارفين إحنا في أيام خير وبركة، تعالوا نستغلها ونخليها تستمر معانا حتى بعد رمضان.
خلينا نستغل الشهر ده في تحسين سلوكنا، نبعد عن الغيبة والنميمة، نحترم بعض، ونحاول نخلي أخلاقنا دايمًا زي أخلاق الصايم، اللي صيامه مش بس عن الأكل، لكن عن كل حاجة تغضب ربنا. وهو ده الصيام الحقيقي اللي ربنا عاوزه مننا.
تعالوا نعيش رمضان صح. مش كده ولا إييييييييييييييه؟
بقلم
عمرو مرزوق
