كلنا عارفين أن المرض صعب وخصم لازم ننتصر عليه، وكل ما كان الخصم قوي كل ما كانت المعركة بتحتاج صبر وجهد ورحلة علاج دقيقة..
من حوالي أسبوعين جتلي دعوة كريمة في حفل عشاء بمناسبة مرور خمسين عام على إنشاء قسم الاورام بجامعة عين شمس، وهناك شفت اللي كتير مننا الحقيقة ممكن تكون غايبة عنهم..
اعذروني في مقالي اليوم بس محتاجين نتكلم شوية في المرض دا.. ومن فضلكم اقروه للآخر ولو شيرته ياريت عشان نقدر نساعد بعض..
بداية خلينا نتفق ياجماعة أن السرطان مرض قوي وخصم مش سهل، لكن الحمد لله ارتفعت مؤشرات الشفاء منه بنسب عالية وبتتضاعف نسبة الشفاء في الفترات الأخيرة، ودا كل ما كان التشخيص مبكر بيساعد على العلاج فبيتم محاصرته و القضاء عليه بكل سهولة.
مش فيه مقولة بتقول اعرف عدوك؟
ماهي رحلة العلاج مرتبطة بأننا نعرفه الأول وبعدين نعرف ازاي نحاربه ونتكافل مع بعض عشان نقضي عليه، لأن هتلاقوا فينا وفي كل أسرنا ناس توفوا بالمرض اللعين دا، كلنا بقى عندنا فوبيا منه بس عشان كدا لازم نواجهه، لكن كلنا مش عارفين ازاي نساعد أو نمد أيدينا حتى بالطبطبة على أي مريض ونحاول على الأقل نقف جمبه وندعمه.
تعالوا احكي لكم على جمعية جميلة أوي اتبنت الفكرة دي.. في بداية الثمانينات مستشفى الدمرداش التابعة لكلية طب عين شمس تم إنشاء قسم فيها للأورام، وكان بيخدم وقتها مئات الحالات يوميا من داخل وخارج القاهرة وكان العمل بيها بيقوم علي قدم وساق وبكل جهد من أطباء لأطقم تمريض لإدارة ناجحة وكان عبارة عن عيادات خارجية متخصصة، ووحدة للتشخيص المبكر لأورام الثدي ووحدة للعلاج الكيماوي والسيطرة الاكلينيكي ووحدة للإشعاع والفيزياء الطبية وجهاز محاكي بالأشعة المقطعية لتوصيل الإشعاع بنسبة أكتر دقة ودا لرفع نسب الشفاء وأعراض جانبية أقل..
وكانت غرف القسم فيها حوالي 50 سرير عشان تقدم الرعاية الطبية المتكاملة والحالات الحرجة وبكدا كان بيحاول يقدم علاج ومتابعة وتقديم الجرعات الكيماوية في وقتها المحدد للسيطرة على المرض.. ولأن من بداية تشغيل المستشفى كان المقرر أن العلاج يكون فيها لغير القادرين وبالمجان، ويكون بأحدث الطرق والإمكانيات، ولأن تكلفة العلاج بتكون كبيرة وأوقات كتيرة مش متوفرة للمرضى لأنها بتكون من خلال قرارات علاج وزارة الصحة يعني على نفقة الدولة.
ولأن القرارات دي في الغالب بتاخد وقت و بتكون حالة المريض حرجة ومش مستحملة تأخير عشان يبدأ محاربة المرض بالعلاج وعمل إشاعات بنوعية خاصة من الصبغات، أو علاج معين فكان البداية فكرة من هيئة تدريس القسم بأنهم يجمعوا تبرعات منهم ومن معارفهم لكن طبعا ماكانتش كفاية.
كان لازم الأهم أنها تاخد شكل رسمي فقاموا بإنشاء جمعية مشهرة باسم جمعية “أيادي الشفا” وهي جمعية أهلية غير حكومية غير هادفة للربح وموجهة للأعمال الخيرية مشهرة (تحت رقم 9848 لسنة 2015) لعلاج الأورام لغير القادرين بالمجان.. بمجهود مجموعة من أهل الخير وعدد أعضاءها 14 اللي هما هيئة تدريس قسم الأورام رئيسها دكتورة نڤين جادو، لكن مع زيادة المرضى واحتياجاتهم الضرورية للمساعدة في عملية العلاج بقى المطلوب حاجات كتيرة عشان يقدروا على الحرب الشرسة دي..
فمثلا على سبيل المثال لا الحصر محتاجين أجهزة لازمة للعلاج زي أجهزة الإشعاع اللي تكلفة الجهاز الواحد بتوصل ل70 مليون جنيه، وإنشاء غرف لاستقبال المرضى مجهزة لخدمة احتياجاهم، وصيدلية اكلينكية لحماية المرضى، والفريق القايم بعلاجهم بالعلاج الكيميائي والإشعاعي دا غير تجهيز غرفة كيموثيرابي، وطبعا هتبقي الجمعية محتاجة للمزيد من التبرعات عشان نوفر شوية من مستلزمات التشغيل والعلاجات للمرضى.
وعلى فكرة بتبرعات واطإسهامات أهل الخير تم إنشاء غرفة لعزل للمرضى اللي بيعانوا من نقص شديد في المناعة بعد جرعات الكيماوي، والغرفة دي ساعدت علي إنقاذ حياة مرضى كتير كانوا بيضيعوا مننا بسبب نقص مناعتهم..
المهم عايز اقول ياجماعة أن الجمعية في حاجة ماسه للتبرع لأنه هيسهل عليها شراء الأدوية والأجهزة من الخارج، فساهموا باللي تقدروا عليه حتى ولو كان مبلغ صغير ولو بعشرة جنيه صدقوني الموضوع أصعب مما تتخيلوا وكل يوم المرض بيقدر ينتصر على عشرات.
طب نقدر نساعد ازاي
شاركوا بصدقة جارية تفيدكم وتسعد قلوب تانية كتير، اتبرعوا بأي حاجة وكونوا السبب في علاج وإنقاذ حياة، شاركوا باللي تقدروا عليه جهد أو وقت حتى لو مش قادر ماديا تقدر تزور القسم وتدعمهم معنويا تحسسهم أن في ناس بتدعيلهم ليل ونهار، تقدر تمنشن لطبيب أورام يقدر يتبنى كام حالة من غير المقتدرين ماديا ويستقبل في عيادته كام حالة بدون أجر وعند الله هتبقى كبيره أوي، أبسط شي تقدر تشير البوست على نطاق واسع عشان الناس تعرف بجد أننا في حاجة لدعم نفسي ومعنوي ومادي ولازم الكل يشارك فيه.
أخواتنا المرضى محتاجين أيد تطبطب عليهم، محتاحين زيارة وابتسامة تخفف عنهم وتديهم أمل محتاجين فاعل خير يخصص مكان للناس اللي من خارج القاهرة ويجي يوم أو اتنين عشان ياخد علاجه ومابيبقاش عنده قدرة مالية لمكان يقعد فيه.
{وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ۚ}
لو عايزين تشاركوا.. أنا هسيب لكم لينك الجمعية التابعه لقسم الأورام، وتقدروا تخشوا تشوفو صفحتهم وشاركوا بأي حاجة تقدروا عليها زي ما اتفقنا..
وممكن تتبرعوا دلوقتي لـ #جمعية_أيادي_الشفاء لمرضى السرطان من خلال…
📲 بنك مصر على حساب رقم 149/1/666666
📞 على 01028611840
جمعية أيادي الشفاء لمرضى الأورام
– Ayadyalshefaa
ربنا يجزيكم خير أنتم والقائمين عليها يارب وكل من هيشارك لو بدعوة من القلب.
بقلم
عمرو مرزوق
