زمان قالوا إن اللي مالوش ماضي مالوش حاضر. وإحنا بقى عندنا حضارة عريقة بننتمي ليها، حضارة عمرها أكتر من 7000 سنة. العالم كله يقف أمامها باحترام وإجلال، وكل يوم يحاول يكتشف سر من أسرارها: معابدها، أهرامها، نقوشها، مومياواتها، آثار كتيرة عتيقة، كلها أسرار وجمال شغلت العالم كله.
زي ما العالم كله مشغول بافتتاح المتحف المصري الكبير، حدث كبير مش على المستوى المحلي، لكن على المستوى العالمي. المتحف مش مجرد مبنى جديد وكبير، اتعمل لأ، ده مشروع قومي بيحمل في طياته روح مصر القديمة وجلالها. تعالوا نتعرف عليه أكتر.
المتحف اتبنى على مساحة ضخمة قرب أهرامات الجيزة، وبيعتبر أكبر متحف أثري في العالم مخصص لحضارة واحدة. شايفين العظمة؟ والتصميم نفسه تحفة معمارية، فيه مزج بين الحداثة والعراقة، وكل تفصيلة فيه معمولة بدقة عشان تخلي الزائر يحس إنه داخل رحلة زمنية بترجع بيه آلاف السنين.
من أول لحظة هتشوف تمثال رمسيس الثاني واقف شامخًا في البهو العظيم، بيستقبلك بعظمة الملوك. وبعدها تمشي في ممرات بتحكي قصة مصر من أول الممالك القديمة لحد العصور الحديثة. فيه قاعات ضخمة مخصصة لتوت عنخ آمون، وكل قطعة محطوطة في مكانها الطبيعي كأن الزمن رجع بيها من تاني.
الافتتاح اللي العالم كله مستنيه مش بس حدث ثقافي، لأ، ده نقلة في السياحة المصرية. المتحف هيجذب ملايين السائحين وهيخلي القاهرة على خريطة السياحة العالمية من جديد، ده غير إنه هيكون مركزًا للتعليم والبحث والتفاعل الحضاري. مش مجرد مكان لعرض الآثار، لكنه المتحف المصري الكبير، معايشة ليها، لأنك ببساطة أول ما تدخل بوابته هتحس إنك دخلت قلب التاريخ نفسه.
هتشوف حضارة أكتر من سبعة آلاف سنة قدامك في مشهد واحد، وهتعرف إن كل حجر ليه حكاية، وكل تمثال له سر. المكان مش مجرد متحف، ده تجربة كاملة فيها علم وفن وبهجة. وهو مش بس مشروع، ده وعد… وعد إن التاريخ لسه بينبض وإن مصر دايمًا في الصدارة.
والله يا جماعة، المتحف المصري الكبير شهادة حية على قدرة المصريين على الإبداع، وعلى إننا مش بس أصحاب تاريخ، لكننا كمان بناة مستقبل.
مش كده ولا اييييييييه؟
بقلم:
عمرو مرزوق
