الميديا ومواقع التواصل الاجتماعي في مصر بقالها كام يوم ما ورهاش غير عاملة النظافة عبير علي الإسكندرانية الأمينةالجدعة، وحكايتها مع الشيك اللي لقيته أبو مليون جنيه جوه حمام السيدات..
الشيك دا محرر لحامله يعني يقدر أي حد يصرفه من البنك، ولكنها قامت بمنتهى السرعة ومن غير اأي تردد ولا تفكير مسلماه للإدارة عشان يردوه لأصحابه وتخلي مسؤوليتها منه وتريح ضميرها.
هي مافكرتش لحظة أن بالمبلغ دا ممكن تحل كل مشكلاتها دا كمان رفضت كل المغريات وقت ماسلمت الشيك للإدارة عشان يلاقوا صاحبه أو صاحبته مع أن ربنا هو الأعلم بظروفها الصعبة واد ايه ممكن تكون محتاجة حتى لعُشر المبلغ، بس هي اختارت أنها تكون نموذج وقدوة في الأمانة وكمان تدي درس حي لبناتها وتعريفهم أن أداء الحقوق والمحافظة عليها فضيلة وهي أغلى من كنوز الدنيا.
ياجماعة ماتستغربوش لما اقول أنا مش مستغرب من أمانتها واللي عملته، لكن اللي حقيقي مستغرب له للأسف الشديد أننا بعدنا عن الخصال الحميدة الجميلة اللي اتربينا عليها ومنها الأمانة، زمان علمونا أن الأمانة هي الإخلاص والوفاء وأن الإيمان والأمانة وجهان لعملة واحدة.
يا جماعة ماتنسوش تربوا ولادكم زي ما احنا اتربينا من صغرنا على الأمانة والصفات الحميدة الحسنة واللي نقدر من خلالها نطلع منهم جيل سوي، فهموهم أن الأمانة بتبدأ من الشخص نفسه وهي بأنه يقيم شعائر دينه شكل صحيح، وكمان حفظ الدين، عرفوهم إن الله يحب الإنسان الأمين وأن الأديان كلها بتدعو للأمانة.
حبيبنا المصطفى اتعرف بأنه الصادق الأمين، موسى عليه السلام اتوصف من ابنة شعيب بأنه القوي الأمين، اتذكرت في القرآن الكريم فقال تعالى: ﴿إِنَّ اللَّهَ يَأْمُرُكُمْ أَنْ تُؤَدُّوا الْأَمَانَاتِ إِلَى أَهْلِهَا}.. واتذكرت كمان في الانجيل {أما الرجل الأمين فمن يجده؟!}(أمثال20: 6).
ازرعوا جواهم مفهوم الأمانة وعرفوهم أن من الأمانة أنك تدي كل صاحب حق حقه، ولو ائتمنت في يوم على مال حد وماردتهوش تبقى خيانة كمان لازم نعلمهم أن الأمانة مش فلوس وبس لا دي الأمانة صيانة السر وحفظ واجب النفس، والدين، والعرض، حفظ الأولاد والزوجة أمانة لأنهم من نعم ربنا اللي نحافظ عليها.
الشغل وأسراره أمانة، لازم تقوم به على أكمل وجه، والبعد عن الرشاوي استغلال الوظيفة، الكلمة أمانة تدخل صاحبها الجنة أو ترمي به في النار عشان كدا لازم نحافظ عليها، الأمانة في المسؤولية كل إنسان سوا كان حاكم أو أب أو أم أو حتى طفل لازم يعرف أنه راع ومسؤول عن رعيته، الأمانة بتكون بحفظ الجوارح من النظر للمحرمات، ودا هيعمل علي القضاء على الفواحش في المجتمع، تؤدي الأمانة إلى اتقان العمل وبالتالي تؤدي إلى تقدم المجتمع، الأمانة دليل على حسن الخلق.
الأمانة احنا اللي اخترناها بجهلنا لما ربنا عرضها على السموات والأرض لكنهم رفضوا، لكن الإنسان هو اللي اختار حملها عشان كدا لازم نكون على اد المسؤولية، صحيح هي مش سهلة لكن دي اختيارنا فلازم نفضل شايلينها وحاملينها لحد يوم الدين وبضياعها وقتها هتكون الساعة.
قال رسول الله صلى الله عليه وسلم: “إذا ضيعت الأمانة فانتظر الساعة”.
مش كدا ولا اييييييييييييه؟
بقلم
عمرو مرزوق
