كتبت: رضوى النحراوي|
بما إننا في شهر المرأة خلونا نتكلم عن موهبة شابة نجاحاتها محفزة لكل البنات، بيعتبروها ملاك المزيكا في مصر ..مي عبد العزيز.
مي عبد العزيز هي الصوت الملائكي اللي مليان قوة وهي بتقولك: ارمي خوفك وأشجع واحد، بتدينا حافز وتقول: هي دي الحياة، كلنا بنحاول ولن أنكسر، أما بقى لما نتكلم عن الحب فبتقول: أنا معاك، قلبي ليك، وأنا وأنت.
من الآخر كده مي صوت ملائكي جميل مليان قوة وأمل، مغنية شاملة بتكتب معظم أغانيها وبتلحن كمان.
نشأتها ورحلتها:
مي عبد العزيز من مواليد 1987 وحاصلة على بكالوريوس الإعلام من الجامعة الأمريكية في القاهرة.
بعد التخرج اشتغلت في شركة للدعاية والإعلان لتنفيذ إعلانات الإذاعة، لكن انطلاقها لعالم الغناء جاء بالصدفة وحبها للموسيقى والانطلاق جه مع أول أغنيتين ليها كانوا ” أشجع واحدة” واللي بتعبر عن حال الأنثى العربية في العموم وتحديدا في حالة اتخاذها أي قرار حتى لو بسيط.
أما Muhammad” “Beautiful واللي عملتها بعد الفيلم المسيء للرسول ردا على الإهانة وقد لاقت الأغنية تفاعلا عالميا جميلا، ومن ساعتها عرفت إن الموسيقى ممكن تكون لغة لتغيير المفاهيم المغلوطة عند الآخر.الأغنيتين اتعملوا من 5 سنوات.
الغناء رسالة:
ومن هنا بدأت الانطلاقة مش بس في الغناء، لكن في الكتابة والتلحين كمان. مي بتقول في فيديو نشرته على صفحاتها على مواقع التواصل الاجتماعي: “الموسيقى بالنسبة لي هي تعبير عن كل اللي بيدور في دماغي: يعني أفكاري، الحاجات اللي بحبها، الحاجات اللي نفسي أغيرها، والحاجات اللي عاوزة أسيبها جوا أدمغة وقلوب الناس عامةً. و أتمنى يكون فيه فن وموسيقى تتكلم عني بعد سنين”.
رسالة للجمهور:
لو في مرة قررتوا تروحوا حفلة لمي عبد العزيز، هتلاقوا ورقة صغيرة على الكرسي اللي هتقعدوا عليه مكتوب بخط إيدها جملة هتخليك تبتسم على طول، زي مثلا ” أنت جميل”.
وفي شكل من أشكال التفاعل الجميل اللي مي بتعمله مع الجمهور، قبل ما تبدأ الحفلة بتقول مع الناس الجملة اللي مكتوبة في الورقة بصوت عالي وبعدين تبدأ الحفلة.
الغناء والدراسة:
مي درست علم نفس الأطفال بعد دراستها للإعلام، وعشان هي بتحب تدرس الموسيقي دمجت تدريس الموسيقى مع علم النفس للأطفال وزارت محافظات مصر كلها تقريبا ودرست الموسيقى للأطفال في أفريقيا وأمريكا وكانت بتنهي كل فترة دراسية بحفلة لإيمانها بأن الموسيقى وسيلة مهمة لتغيير تفكير الإنسان.
مي الإنسانة:
مي كمان مؤسسة مجموعة “You are kind” وهدف المجموعة دي نشر الخير والسعادة من خلال أفعال بسيطة. المجموعة دي بتنزل توزع عصاير وحلويات على الأطفال والناس عامة، وكمان بترعى قطط وكلاب الشوارع.
مي دايما بتنصح متابعيها إن لو حد عنده أي أكل ينفع الحيوانات دي يخلوه دايما معاهم في عربياتهم عشان يأكلوهم، ودايما بتقول إن الاهتمام بالحيونات لا يتعارض أبدا مع الاهتمام بالإنسان المحتاج.
وعلى فكرة مي مش بتغني للحب والتشجيع وبس، لأ دي بتغني أغاني دينية ولحب ربنا كمان. زي أغنية “غفرانك” من كلاماتها، ومن التراث الصوفي “أذوب محبة”، غير الأغاني من الأشعار الجميلة اللي غناها كتير ” تملكتموا عقلي وطرفي ومسمعي” لأبو مدين التلمساني وقصيدة “ذاب قلبي” من “قواعد العشق للسائرين” مع صلاح بجاتو .
ده غير أنها بتمزج بين أغانيها، أغاني عظماء الغناء والطرب بالعربي و الإنجليزي زي: دمجها بين أغنية بعيد عنك لكوكب الشرق وأغنيتها أنا وأنت وأغنية I will always love you ل Whitney Houston وحاجات تانية كتير.
مي شاركت في العديد من الأغاني مثل: “سهلة وبسيطة” مع هاني عادل، نسمة هركي وعبد الرحمن رشدي وألحان الموسيقار الشاب هشام خرما وأحدث مشاركتها في أغنية “حبة أمل” مع عمر غالي. وكمان بتغني بالإنجليزي من كلماتها كوفر “Cover” .
أما عن آخر أغانيها فقد طرحت أحدث أغانيها تحت عنوان “عارف ليه” وهي أغنية بسيطة فيها رسالة لكل من أنهكت الحياة قلوبهم وأحسوا أنهم لا يستحقوا الحب، مي بتقولهم إنهم تستحقوا الحب.
ومن المفترض إنها بتجهز لأغنية من الفولكلور الصعيدي تحت عنوان ” الليلة فرحة” مع شاب موهوب من المنيا اسمه سمارة.
صديقتي عاوزة تحبي، تتشجعي أو تتصوفي فأنتي محتاجة تسمعي الملاك اللي بيغني مي عبد العزيز.
