التجارة شطارة جملة بقينا نسمعها كتير اليومين دول لكن مع الأسف بنسمعها بتتقال في الغلط، يعني ايه؟، هقولكم يعني ايه من الواقع المرير اللي احنا بنشوفه، يعني لما تخفي سلعة عشان ترفع تمنها دي ماتبقاش شطارة، يعني لما تغش في الميزان أو تبيع بذمتين مش شطارة، يعني لما تبيع سلعة وانت عارف أن صلاحيتها منتهية مش شطارة.
طب عارفين أن الشطارة في اللغة معناها ايه؟، معناها حسن التصرف والمهارة في تدبر الأمور والقدرة على التخلّص من المشكلات وحلها، لكن للأسف الشديد اليومين دول اتحرف معناها وبقت استخدام أي وسيلة مهما كانت بغض النظر بقي عن شرعيتها أو لا عشان تحقيق غايات، أو تبرير سلوك لعمل مش مناسب وبكدا اتوصمت الشطارة بالدهاء وبعدين اتحولت لمكر وخبث حاملة معاها الغش والاحتكار والتدليس كأبرز علامات الشطارة.
يا ناس البيع والشراء عملية تبادل مصالح متعارف عليها من البشر من قديم الأزل وهي بمجموعها كدا عبارة عن فن وأخلاق نبيلة لكن للأسف تعالوا شوفوا أغلبها دلوقتي عبارة عن غش وتدليس، ارتفاع الأسعار الجنوني اللي بيحصل كل يوم بمبرر وبدون مبرر مخلي التجار بترفع الأسعار، وكأنهم أعداء للرحمة والفرحة أو حتى أعداء للفقراء.
ولما تيجي تتكلم يقولوا لك المقولة الشعبية التي بيرددها التجار في الأفلام السينمائية “اللي معوش ما يلزموش”، ميلزموش ايه؟ هو في حاجه دلوقتي مش لازمة، الناس خلاص هجرت الرفاهيات وبقينا كلنا نستخدم الضروريات بس وبأقل الإمكان، خلينا نقول بعلو صوتنا لكل النوعية دي من التجار دي مش شطارة.
آمال ايه هي الشطارة؟، الشطارة أنك تعرف تكسب ازاي ومن مين وتعرف تكسب أكتر ازاي، محدش قال ولا يرضى أن التاجر يخسر لكن برضه الرحمة حلوة، اكسب بس مش معنى مكسبك استنزاف لناس ربنا عالم بحالهم، شطارة في أن تتاجر صح وتتاجر مع ربنا الأول ودور على مكسبك منه قبل مكسبك من الناس.
لازم نفهم لما اتقال التجارة بركة مكنش مقصود منها تراكم الأموال والأرباح بس، إنما توفير حاجات الناس بطريقة لينة مش فوق طاقتهم ولا تجبرهم على الدين والسلف عشان يقدروا يشتروا احتياجاتهم ويصبحوا ضحايا الدين والأرق والمحاكم.
خلوا بالكم أن احتكار سلعة معناها ابتزاز للمستهلك فلما يكون التاجر هو الصانع الوحيد، أو المستورد الوحيد لصنف معين أو يكون المتعهد الوحيد لبيعه، وقتها بيفرض أسعار عالية مستغلً حاجة المشترين، فينهب أموالهم لأنهم بيشتروا منه وهم كارهين ومضطرون.
عايز تبقى تاجر شاطر ارضي ضميرك وتاجر مع ربنا وخليك صادق وأمين، سيدنا النبي كان تاجر وكان اسمه الصادق الامين، اكسب بالمعقول عشان تعرف تعيش وتخلي غيرك يعرف يعيش، بيع بذمة واحدة واضبط ميزانك وإياك تكون من المطففين هتخسر دنيا وآخرة، إياك تخبي سلعة وتبيعها بسعر أعلى، والله دي أفضل التجارات الرابحة في الدنيا والآخرة، النبي – صلى الله عليه وسلم – قال: (التاجر الصدوق الأمين مع النبيين والصديقين والشهداء).
مش كدا ولا اييييييييييييه؟
بقلم
عمرو مرزوق
