فى الأوله…
قلنا جيِّنلك وجينالك ولا تهنا ولا نسينا
والتانية…
قلنا ولا رملاية فى رمالك عن القول والله ما سهينا
والتالته…
إنتي حملي وأنا حمالك
وصباح الخير يا سينا رسيتي فى مراسينا
تعالي فى حضننا الدافي ضمينا وبوسينا يا سينا
ذكرى حرب أكتوبر السنة دي لها طعم خاص ودا لأنها السنة دي بيكون مر عليها أكتر من نصف قرن يعني 51 سنة، ياه خمسين سنة.. وعشان كدا هتلاقي ناس بترجع بذاكرتها للأبام دي وترجع تعيش معاها بحلوها ومرها وتستشعر من أول لجديد لحظة الانتصار وفي نفس الوقت هنلاقي أغلبيتنا ماشفوهاش ولا عاشوها لكن يادوبك عاشوها كتاريخ تم دراسته أو شافوها من ضمن أحداث الأفلام السينمائية أو بالكتير أوي قرأوا عنها ما هو برضه 51 سنة مش شوية لكن لو حبينا نتكلم عنها مع بعض تعالوا نسترجع أحداثها ونشوفها بعيون اللي حضروها وعاشوها..
حرب أكتوبر استمرت 10 أيام ومن خلالها قدر يستعيد المصرين ذكرى وطعم النصر اللي سبقتها سنين من الهزيمة والاستنزاف والاستعداد أنهم يدخلوا حرب الكرامة، حرب أكتوبر اللي أرغمت إسرئيل على التقهقر وكانت نتيجتها تحرير الأرض واستعادة سيناء اللي فيها تم دفع تمنها من دم ولادها وكانت سبب أن مصر قدرت ترجع حته منها وتحضن من تاني تراب أرضها بعد أن ما كان خلاص انسرق منها، ماتيجوا نشوف بسرعه قصة حرب أكتوبر كاملة..
بعد نكسة 1967 احتلت إسرائيل أراضي عربية واسعة سيناء بالكامل وقطاع غزة والضفة الغربية وكمان هضبة الجولان فكان لازم بقى من رد الاعتبار، وعلى مدار 6 سنين استعدت مصر وسوريا للحرب العربية الرابعة مع إسرائيل الحرب دي اللي سمتها مصر حرب أكتوبر أو حرب العاشر من رمضان وسمتها سوريا حرب تشرين التحريرية أما إسرائيل فسمتها حرب يوم الغفران أو يوم كيبور..
بدأت الحرب في 6 أكتوبر 1973 وانتهت في 26 أكتوبر 1973 ودارت الحرب في مصر وسوريا وإسرائيل، كان السبب الرئيسي للحرب هو الخلاف حوالين السيطرة على شبه جزيرة سيناء وقطاع غزة، وجت بعد صراعات عربية مع إسرائيل واللي بدأت بحرب 48 في فلسطين بعدها العدوان الثلاثي سنة 1956 على مصر أما الثالثة فهي نكسة يونيو 1967..
عشان كدا حرب أكتوبر زي ما كانت بتحدد مصير أمة فكانت برضه أخد بتار ولاد نفس الأمة اللي فقدتهم خلال الـ 3 حروب غير حرب الاستنزاف ومع التنفيذ لخطط الهجوم الجديدة والتدريب على أسلحة حديثة وكمان التنفيذ المحكم لخطة خداع كل دا تم مع تحالف الشعب فبقى الجيش والشعب نسيج واحد يعني كانت الجبهة الداخلية جزء من ميدان المعركة.
بصوا يا جماعة حرب أكتوبر واستراتيجيتها وازاي حصلت ونتائجها محتاجة كتب مش شوية سطور عشان نقدر نوفيها حقها، ولكن يفضل نصر أكتوبر عنوان عظيم لإرادة المصريين اللي لا تُقهر مهما كانت قوة العدو وخسته.
عاوز اوصل معاكم إلى أن الهزيمة بتكون أول خيط وأول خطوة لتحقيق الانتصار الأصعب، ومادام فيه عزيمة فهنقدر نقهر المستحيلات ويحقق المعجزات، وطبعا إيماننا بالله في الأول هو سبب النصر وأول سطور المجد.
وآخر حاجة أحب أقولها أن زي ما العزيمة والصبر والإيمان كانت من قواعد وأسباب النصر فلازم نحطهم ادام عينا ونغير حاجات كتيرة وحشة فينا ونطور من نفسنا ونتغلب على كل الصعوبات وصدقوني هتتغير حاجات كتير أوي للأحسن.
مش كدا ولا اييييييييه؟
بقلم
عمرو مرزوق
