رضوى عماد تكتب
من كام يوم كنت مع أختي في مستشفى الولادة و بعد ما خلصت عملية الولادة بكام ساعة و هي في شدة التعب أحد الزائرين قال لها بعد المباركة: “بس خلي بالك أنتي عملتي حاجة حلوة”. الجملة دي رسمت أبتسامة جميلة أوي على وشها رغم التعب اللي كانت فيه، بصراحة الجملة دي خلتني اقعد أفكر هو ممكن يكون قال كدة ليه. هل من باب أنه راجل شيك و بيجامل بكلمات رقيقة؟ ولا لما لقاها تعبانة قال يقول كلمتين تشجيع يخففوا عنها التعب؟ ولا تقديراً للعمل الكبير و المتعب و الجميل بجد اللي قامت به؟
بصراحة مش ده المشهد الوحيد اللي أستوقفني و أنا في المستشفى، بما أننا في مستشفى ولادة فكل اللي حواليا كانوا يا زوار، يا ناس مرافقين زي حالاتي، يا أبطال الحكاية اللي هم الأمهات اللي لسة مخلفين. قصة كل بطلة من دول بتبدأ مع أول يوم عرفت فيه أن جواها روح منها هتهديها للدينا، يعني كام مرة أي ست حامل كان قدمها أكل أو شرب بتحبه و حرمت نفسها منه عشان تحافظ على صحة أبنها أو بنتها اللي لسة ماجوش الدنيا. الحكاية مخلصتش عند الحرمان من أكلات أو مشروبات لا ده تغير تام لأسلوب حياة لمدة 9 شهور و بعدهم بحبة حلوين كدة. أنتو عارفين القوة اللي جوا كل واحدة فينا مرت بكل ده أو لسة ممرتش أو نفسها تمر بيه قد أيه.
أنك تكوني قوية صحيح مش حاجة سهلة بس برضه مش خناقة، أنك تكوني قوية يعني تبقي مسؤولة، ذكية، تبقى سيدة أعمال أو طالبة ناجحة جداُ و بنوتة/ست رقيقة في نفس الوقت. في طريقنا لتحقيق أهدافنا و نجاحتنا كتير بننسى نفسنا، بننسى أننا بنات و ستات. أنشغالنا بحياتنا العملية و أننا نطلع البطلة القوية اللي جوانا بينسينا نسأل عن الرقيقة الجميلة اللي جوانا. فأحنا عاوزين مع بعض واحدة واحدة كدة نظبط الميزان، عشان كل واحدة فينا تقدر تكون ناجحة و قوية (سترونج أندبندت وومن Strong Independent woman) و ست الكل و هانم (لادي Lady).
خلونا نتكلم في كام نصيحة سهلة و بسيطة عشان نبدأ طريق الوصول لتحقيق الميزان ده. اليوم فيه 24 ساعة كده معناه أنك تقدري تعملي حاجات كتير فيه زي: تنامي 8 ساعات، تذاكري لو لسة طالبة أو بتعملي دراسات، تروحي الشغل لو امرأة عاملة، تراعي بيتك لو زوجة، و الأهم من ده في وقت كافي جداُ انك تاخدي بالك من نفسك. لو جينا نتكلم عن أهمية النوم لصحة المرأة و المراهقة يجب أن نشير إلى نتائج الباحثين الحديث اللي اتنشرت في موقع “بولد سكاي” اللي قالوا فيها أن الست بتحتاج من 7-9 ساعات نوم يومياُ يعني متوسط 8 ساعات و المراهقات من 9-10 ساعات نوم، الباحثين وصلوا للنتيجة دي لكذا سبب أهمه: 1) المجهود الذهني الكبير، معروف طبعاُ أن الستات و البنات بتقدر تعمل كذا حاجة في نفس الوقت و ده بيحتاج أنها تنام سعات كفاية عشان تشحن و تقدر تكمل. 2) من أول سن المراهقة أى واحدة معرضة لتقلب الحالة المزاجية تأثيراُ للتغيرات الهرمونية و اللي بتأثر على النوم في بعض الأوقات، فبتحتاج تتعوض. 3) مهو مينفعش تكوني طول النهار بتشتغلي برة و جوة البيت أو بتدرسي و تيجي متنميش كويس. و أخيراُ ملخص الدراسة أن الستات و البنات اللي مش بيحصلوا على عدد ساعات كافية من النوم معرضين لأمراض السكري من النوع الثاني و أمراد أوعية الدم، فخلي بالكوا من نفسكم أنتم الأهم. و لما نيجي نتكلم عن القوة المعنوية فلازم تكوني ناجحة في شغلك و دراستك، يعني تديهم أهتمام و تعمليهم بشغف عشان يكون ليكي كيان قوي و مهم و مسؤولة قدام نفسك و الناس و تجذبي أحترام الكل لكي. نيجي بقى لأنك تهتمي بنفسك طبعاُ جزء من ده أحنا أتكلمنا عنه و هو النوم لساعات كافية، و حاجة تانية هي أنك تهتمي بصحة النفسية و العضوية و دي لو أنتي معافاة يبقى مش هنحتاج للدكاترة أن شاء الله. و هنا أقصد أنك تلعبي رياضة بشكل مستمر، لأن:1) الرياضة بتساعد الجسم أنه يقاوم التعب و التوتر العصبي. 2) تفادي التعرض لأمراض القلب و الأوعية الدموية. 3) الحماية من الشيخوخة. 4) بتحسن الأداء العضوي للجسم. 5) تحفيذ الطاقة الايجابية. 6) تحسين الحالة المذاجية.شوفتوا الرياضة مهمة أزاي.
أختي و صديقتي العزيزة في رحلة لتحقيق ذاتك و أحلامك و تكوين شخصيتك، من فضلك ماتنسيش الحلو اللي جواكي. الحلو ده هو أنتي برده هو جمالك، أنوثتك، صحتك و جمالك. زي ما قولنا اليوم الطويل و يستحمل تعملي كل اللي أنتي عوزاه، يعني مافيش مانع أنك تاخدي شوية وقت من اليوم عشان تعملي ماسك لشعرك أو وشك أو جسمك كل كام يوم. و طبعاُ لو في أمكانية هيكون مفيد جداُ أنك تأخذي ميعاد في بيوتي سنتر مثلاُ أو ما شابه. ممكن كمان تتفرجي على فديوهات من على اليوتيوب (YouTube) عن أزاي تعملي ماسكات سهلة في البيت، أو أزاي تعملي معالجات لبشرتك كأنك رحتي بيوتي سنتر (Beauty Centre ).
و أخيراُ أنتي لازم تبقي عارفة و متأكدة من جواكي أنك قوية و جميلة و ناجحة، و متستنيش من حد أنه يقولك كدة. و مهما قللوا من اللي أنتي بتعمليه ولا يهمك، و خليكي دايماُ فاكرة أن أنتي منبع الحياة و أصلها. أنتي اللي بتشوفي وجع كبير و أنتي بتهدي الدنيا روح جديدة و أنتي اللي هتربي و تكبري عشان يطلع/ تطلع راجل/ست مسؤول/مسؤول. عزيزتي الأنثى…..أنتي الحياة!
