أهل زمان قالوا بفطرتهم لسانك حصانك أن صنته صانك وأن هنته هانك، وقالوا كتير أن الملافظ سعد.
أمثال شعبية كتيرة بنقولها وسمعناها كلنا من أهلنا، وكلها بتأكد لنا أن الكلمة اللي بينطقها الإنسان، إما أنها تصون كرامته وكرامة اللي حواليه وتنشر قيم التسامح والود في المجتمع، وإما تكون قنبلة شديدة الانفجار تدمر الأخضر واليابس وتهدم أمن وأخلاقيات المجتمعات بقسوتها وكذبها..
الكلمة نعمة ربنا أداها للإنسان مكنته من أنه يقدر يقول ويعبر ويوصف كل اللي حوله، وهي اللي بتفرق بين الإنسان وبقية المخلوقات، عشان كدا هي أمانة في رقبته.
هنلاقي كل الشرائع السماوية حذرت من الاستخفاف بأهمية الكلام، وبينت آثاره السيئة واللي ممكن يحصل بسببه، لازم نعرف أن الكلمة الطيبة صدقة لكل واحد عايز يتصدق صدقة مش مكلفة ولا صعبة، صدقة بتدخل السرور والأمان والراحة في نفس اللي بيستمع ليها، الكلمة الطيبة سهم يدخل القلب، بس مش بيجرحه لا دا بيقويه ويصبره ويدعمه.
على فكرة أسهل حاجة في الدنيا هي الكلمة الطيبة واللي تقدر تعملها في كل وقت ومع أي حد، بر والديك بكلمة طيبة، بر أقاربك بكلمة طيبة، جرب كدا تقولها لشخص حزين والله مش بس هتسعده لا دا أنت هتجبر قلبه وخاطره، مش قلنا قبل كدا جبر الخواطر على الله.
الكلمة الحلوة تقدر تفتح بيها أبواب من حديد، قولها وأنتت ناوي الخير، قولها وأنت قاصد بيها الخير، ولازم تعرف أن لو خرجت الكلمة من القلب لازم هتدخل في القلب، ولو خرجت من اللسان مش هتوصل إلا للآذان.
الكلمة الطيبة دور عظيم في حياة الإنسان وبناء المجتمعات، والكلمة على مدى التاريخ الإنساني فتحت بلاد ووهزمت جيوش، خلي بالكم من الكلام ياجماعة شوف كلمتك رايحة فين، حاسب عليها، طبطب عليها وهي طالعة منك، إياك تجرح بيها حد، واعرف أن الفرق بينها وبين الكلمة الخبيثة كبير جدا فرق الحق والباطل والفضيلة والرذيلة، لأن الكلمة الطيبة تبني وبتعمر والخبيثة بتهدم وتخرب.
تعرفوا أن من بين جميع الأسلحة المدمرة اللى اخترعها الإنسان تبقى الكلمة أكثرها فظاعة وجبنْ ولؤم، التنمر كلمة، رمي الناس بالباطل كلمة، شهادة الزور كلمة، الإيذاء اللفظي وبالأخص الإيذاء النفسي والاجتماعي للشخص بشكل عدائي والطعن بسمعته والتشهير به وشن حملات نفسية شديدة عليه.
إياك تتكلم عن حاجة أنت مش عارفها ولا تحكم عليه، إياك تتكلم في ظهر حد، حاول قبل ماتحكم على إنسان اسمع منه ولا تسمع عنه اعرف ظروفه وعشها وبعدها اتكلم عنه، أجدادنا دايما كانوا بيقولوا خليك محضر خير يعني حاول تقرب وجهات النظر، حاول تصلح وتنهي الخصام بين الناس، عارفين أن الكذب مش حرام في ثلاث مواضع، منه إصلاح الخصومة بين الناس ودا طبعا مش هيجي غير بالكلمة الحلوة الطيبة.
الكلمة الطيبة مش بتقتصر بس على المدح أو قول الكلمات الجميلة للآخرين لا دي كمان بتشمل النصحية الحقيقة النابعة من القلب والمحبة الخالصة، ويتشكل لإصلاح بين الناس بالقول المليء بالخير، كمان هي بتساعد في تجاوز الأحزان لأن اللي هسمعها هيشعر بالأمل ويتجدد في قلبه، ويشعر بأن الحياة لسه جميلة وتستحق أنها تتعاش والله ياجماعة هي كنز كبير غالي لازم نتمسك به دايما.
ضيف عملاً صالحاً لمن يقولها في كل وقت وتفتح له أبواب الخير وتغلق عنه أبواب الشر، كما أن الكلمة الطيبة تجدها رقيقة وجميلة لا تعمل على إيذاء الآخرين ولا تخدش نفوسهم.
ولازم نخلي بالنا أن الكلمة إذا خرجت مش هتقدر ترجعها مرة تانية، لأمها زي ماقلنا زي الرصاصة هو ممكن ترجعها تاني بعد ماتخرج وتحرك وتموت أو زي الدوا اللي هنديه لشخص مات خلاص ياتري هينفعه؟، عشان كدا قالوا لو كان الكلام من فضة فالسكوت من ذهب.
ونصيحة مني لو عايز تعيش في حياتك ضميرك مرتاح وتلاقي اللي يدعي لك من الناس في مماتك دايما، قل دايما وأبدا كلمة طيبة.
ومفيش أجمل من أني اختم كلامي بكلام عمنا الكبير عبد الرحمن الشرقاوي أما قال:
أتدرى ما معنى الكلمة؟
الكلمة نور
وبعض الكلمات قبور
ما دين الله سوى كلمة
ماشرف الرجل سوى كلمة
مفتاح الجنة في كلمة
ودخول النار على كلمة
وقضاء الله هو الكلمة
أتعرف ما معنى الكلمة؟
الكلمة لو تدري حرمة
زاد مذخور
الكلمة نور
وبعض الكلمات قبور
بقلم
عمرو مرزوق
