الحب حاجة جميلة أوي ولما أقول حب أقصد حاجات كتيرة أقصد حب الحياة، حب الوطن، حب العيلة، حب نفسنا، حب ولادنا، حب شوارعنا وحوارينا، حب مخلوقات الله، حب الناس، حب الصدق وغيرهم وغيرهم من الحاجات الجميلة اللي عايزينها تنتشر في مجتمعنا.
عايزين نحارب بالحب الشرور اللي بقت موجودة بينا في عالمنا ومجتمعنا وعشان ابقى صريح أكتر هقول للأسف الشديد الشرور بقت كمان في بيوتنا وأوقات جوا نفسينا، جميل اوي لو عيشنا على مبدأ انا احب إذن انا موجود هتتغير الدنيا كتير.
وياما ناس اتكلموا عن الحب وعن أثره الإيجابي في تغير حياتنا من النقيض للنقيض لكن أنا جي انهاردة اطلب منكم حاجة مش متعودين عليها جي اطلب منكم الكره، طبعا مفاجاه لكن لما تعرفوا أنا قصدي ايه وتفهموا هتعرفوا أنا بطلب كدا ليه..
عارفين أن الكره أوقات كتيرة بيبقى ضروري ومهم، هتقولوا ازاي؟ هقولكم لما يكون الحب والكره وجهان لعملة واحدة، عشان كدا عايزكم تتعلموا ازاي وامتي تكرهوا، اكرهوا قسوة القلب، اكرهوا الغش، تكرهوا الحقد، اكرهوا الخيانة، اكرهوا الفساد، اكرهوا كل قبيح..
اكرهوا كل حاجة تبعدنا عن ربنا وتبعدنا عن الطاعات، اكرهوا تدليس المشاعر زي تدليس الحقايق، انتو عارفين أن عشان نعرف نحب الخير لازم الاول نعرف نكره الشر، عايز اقولكم حاجة عشان نعرف نحب أو نعرف نكره لازم في الاول خالص نفهم هو امتى الحب مطلوب وامتى الكره مطلوب..
رب العزة قال في كتابه في سورة الحجرات
بسم الله الرحمن الرحيم
وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِنَ الْأَمْرِ لَعَنِتُّمْ وَلَكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ أُولَئِكَ هُمُ الرَّاشِدُونَ (سورة الحجرات: 7)
ربنا وضحها لينا كل ماهو طيب وجميل وله لاحسن الأثر لازم نحبه وكل ماهو خبيث وقبيح لازم نكره.
الكتاب المقدس بيقول
“اُبْغُضُوا الشَّرَّ، وَأَحِبُّوا الْخَيْرَ، وَثَبِّتُوا الْحَقَّ فِي الْبَابِ، لَعَلَّ الرَّبَّ إِلهَ الْجُنُودِ يَتَرَاءَفُ عَلَى بَقِيَّةِ يُوسُفَ” (سفر عاموس 5: 15)
كُونُوا كَارِهِينَ الشَّرَّ، مُلْتَصِقِينَ بِالْخَيْرِ” (رسالة بولس الرسول إلى أهل رومية 12: 9)
وأظن كدا فهمتوا قصدي من الكره المطلوب وفهمتوا التقارب العجيب والتشابه الفريد اللي بيجمع بينهم، بشكل كبير وصلنا لأننا نفهم امتى يكون الاتنين وجهين لعملة واحدة، عايز اوصيكوا أنكم تخلوا الكره سلاحكم عشان تحولوا بيه الشر واعملوا بيه الخير أو على أقل تقدير توصلوا بيه لفعل الخير.
مش كده ولا اييييييييييه؟
بقلم
عمرو مرزوق
