فيه مثل بيقول: “لو كان الفقر رجلًا لقتلته”.
أنا بقول مش الفقر اللي عاوز يتقتل، لكن اليأس، أيوه اليأس، اللي لازم يتمحى وجوده من حياتنا.
عمر ما البعد عن اليأس كان رفاهية، لا، دا ضرورة علشان نقدر نكمل طريقنا من غير ما ننهزم قدام أول عثرة. الواحد لما يستسلم لليأس بيموت وهو عايش، وبيفقد شغفه وطاقته، وقدرته يشوف أي باب مفتوح قدامه. اليأس لو دخل قلبك هيعميك عن نفسك قبل ما يعميك عن الدنيا، وعلشان كدا، أول خطوة إنك تطرده برا حياتك وتقفل وراه الباب بالضبة والمفتاح.
ومن هنا نرجع للأصل: اعرف نفسك.. اكتشفها.. وافتح باب جواك، يمكن عمرك ما دخلته ولا بصيت حواليك وانت بتعدي عليه. معرفة النفس مش كلمة كبيرة ولا فلسفة، لكن وقفة صريحة بينك وبين روحك من غير مجاملات. الدنيا علمتنا نلبس وشوش ونحط أقنعة، لكن الحقيقة إن أكبر كنز في حياتك جواك أنت مش برة.
بتبقى ماشي ومش عارف إنت مين ولا رايح على فين، وتبقى شايل جواك قدرات كبيرة، وانت فاكر نفسك قليل. خلي بالك إن اكتشاف النفس مش لحظة ولا صدفة، لكن مشوار طويل فيه صراحة وفيه كشف حساب، وفيه شجاعة إنك تبص لنقطة قوتك وتقول: “أه، هي دي اللي هتبني عليها حياتي”.
فكل واحد فينا جواه حاجة مميزة، قوة مختلفة. ممكن تكون ذكاء، ممكن تكون صبر، ممكن تكون قدرة على التحمل، ممكن تكون موهبة في الكلام أو الشغل أو العلاقات. المهم إنك تعرفها وتمسك فيها بإيدك وأسنانك لأنها سلاحك في الدنيا. وكل ما تركز على قوتك، هتكبر وهيكبر معاها طريقك.
ولو قابلتك أيام الضعف والخوف، افتكر إنها محطات مش نهايات. والإنسان اللي بيعرف نفسه صح عمره ما بيضيع في زحمة الدنيا لأنه بيمشي وهو عارف هو مين، وبيعمل إيه، وعاوز يوصل لإيه. واعرف دايمًا إن اللي يعرف نفسه عمره ما ييأس، واللي ييأس عمره ما يعرف نفسه.
فاعرف قوتك، واوعى تتحرج منها، ولا تهونها، ولا تستنى حد يكتشفها بدالك. انت أولى بنفسك، ومعرفتها هي المفتاح اللي بيفتح أبواب كتير كان ممكن تفضل مقفولة طول عمرك لو ما خبطتش عليها.
وفي الآخر، افتكر إن الدنيا بتدي اللي بيسعى مش اللي بيستسلم. واللي يدور جوا نفسه يلاقي كنز مش بيتقارن بمال ولا جاه. وساعتها بس، هتعرف إنك كنت طول الوقت أقوى مما كنت متخيل.
مش كدا ولا ايييييييه؟
