ليه دايما الحب عندنا بيبقي محصور في مفهوم واحد بس مفيش غيره، ولما نيجي نتكلم عنه يبقى كلامنا عن قصص الحب والعشاق والرومانسية وكأن الحب اتوجد عشان كدا وبس..
ياجماعة لو بصينا حوالينا هنشوفه في كل مكان في حياتنا، تعالوا نبص حوالينا ونشوف أكتر زي ايه..
خد عندك مثلا حب الحياة والطبيعة نفسها حب السحاب لبعضه لما يقرب من بعض ويغرق الأرض بالخير والمطر، وحب المطر للأرض لما يسقط عليها ويتوغل في أعماقها زي ما بتتوغل عين العاشق في أعماق عين محبوبه، وحب البذرة للميا وفرحتها بيها كفرحة الأم باستقبال حملها، وحب النبته الضعيفة للهواء واختراقها للتربة زي حب الفرد للحرية والهروب من القيود وحب الزرع لبعضه، زي حب آدم وحواء اللي بينتج عنه أجمل الثمار والأولاد..
حب الأم لولادها من قبل ماعنيها تشوفهم..
حب الأب لأولاده والولاد لأهلها..
ياجماعة لازم الأول نعرف الحب كويس ونعرف ازاي نستعمله ونخليه يستعملنا صح، فالحب هو سيمفونية الحياة اللي بتنساب بكل روعة ورقة وقدامه بتتمحي كل شرور الحياة، هو مجموعة متنوعة من المشاعر الإيجابية والحالات العاطفية والعقلية دي لها تأثير على صاحبها وعلى اللي حواليه وعلى المجتمع ككل..
حد سأل نفسه يا ترى شكل الدنيا هيكون ازاي من غير حب؟.. الناس وقتها هتكون زي الآلات لا فيها احساس ولا حب ولا شعور ولا حتى حلم، الحب هو روح الحياة وأصل الخلق، ايه اللي يفرق بينا وبين الجماد، طب تخيلوا بقى أن الجماد طلع بيعرف الحب ويحن لصاحبه، زمان كانت جداتنا بتقول الحاجة بتحزن على صاحبها وتحزن عليه لو تعب أو لا قدر الله مات.
ربنا خلقنا عشان بيحبنا، فحب الرب للعبد بيتجلى في رحمته وأفضاله ونعمه اللي لو حاولنا نتكلم عنها مش هنقدر نعدها ولا نحصيها، وأنه يزرع حب العبد له وشكره على كل نعمة دا حب منه للعبد، لأن ربنا سبحانه وتعالى ملكه مش هيقل ولا يخسر لو العبد ماطاعهوش، لكن الخسران هو العبد هو اللي هيخسر دنيا وآخرة وكل ماربنا يحبنا هيخلينا نقرب له في العبادات.
لازم تعرفوا إن الحب مش بس شعور لا دا التزام بأفعال، فالمشاعر الناتجة عن الحب بتدفع الإنسان بأنه يلتزم بسلسلة من الأعمال اللي بتغير شكل الحياة للأحسن والأفضل و يقلل الأحزان والآلام.
مش ملاحظين أن الحياة بقت صعبة على الكل عارفين ليه؟.. عشان الحب قل مش بس بين البشر وبعضها لا ده قل كمان بين البشر وكل اللي بيحيط بيه من طبيعة ومخلوقات وحتى الجماد..
لازم تخلي بالنا أن بالحب هنحارب التعاسة والشقاء الموجودين في الدنيا وبالحب هتكون نهايتهم، على فكرة أي تاريخ لحضارة أي أمة كان سببه الحب اللي لولاه لا كانوا اتقدموا ولا بقوا دول وبحبهم خلدوا بلادهم، الحب سبب وجود كل حاجة حلوة في حياتنا، سبب كل الفنون الجميلة زي الموسيقى والفن والأدب.
وعشان كدا حاولوا تتصالحوا مع نفسكم وحبوا كل حاجة، حبوا الحيوانات الغلابة وبلاش قسوة عليها واعرف أم حبك ليهم خير لك قبل مايكون عشانهم، اتعلموا تحبوا الطبيعة من سماء وبحر وشجر حافظوا عليها ومتأذوهاش بالتلوث، حبوا نفسكم وأجبروها على كل طيب وابعدوها عن الشر.
حبوا دينكم لأن الدين من غير حب هيبقى مظهر وقشرة وتطرف، كل الأديان وصتنا على الحب
في الإسلام رسولنا الكريم صل الله عليه وسلّم قال (لا يُؤمِنُ أحدُكُمْ حتَّى يُحِبَّ لأخيه ما يُحِبُّ لنفسه)، وفي المسيحية قول الكتاب (من لا يحب لا يعرف الله لأن الله محبه).
حبوا أهاليكم وأصحابكم واعرفوا أن بالحب القوة بتزيد، أنا وأخويا قوة، أنا وأخويا وجاري وصحبي قوة، أنا بالحب مع كل مجتمعي قوة مافيش عدو يقدر علينا.
حبوا العلم بأن دا اللي هيوصلكم للتقدم الإنساني، والعلم من غير حب يبقى استغلال وقسوة وجبروت، حبوا أماكنكم، حبوا مدينتكم، شوارعكم، بيوتكم، حبوا الجماد، حبوا القلم اللي بتكتب به استعمله في الحق واكتب كلمة الحق، حبوا الكتاب اللي بتقروه عشان تعملوا بيه، حبوا القوة عشان ماتتقلبش لبطش ولا قسوة.
الحب معدي ولا يمكن مقابلته إلا بحب زيه، فحبك للناس من حولك وللحيوانات وللنباتات هيعمل منك إنسان سعيد ومتسامح مع نفسك ومع كل اللي حواليه..
وفي النهاية لازم تعرفوا إن الحب للإنسان هو المرسى الأمين في بحر الحياة،وأن طاقة الحب للناس وللعمل وكل اللي حوالينا، هتنعكس على صاحبها في حياته الحاضرة والمستقبلية سعادة، والسبب الرئيسي في الإصلاح والبناء والتحديث للإنسان والمجتمع.
مش كدا ولا اييييه..؟
بقلم
عمرو مرزوق
