ارحموا من في الأرض يرحمكم من في السماء.. الموضوع اللي جي اتكلم معاكم عليه مش أول مرة هتكلم فيه ولا هيكون آخر مرة، وطول ما أنا شايف اللي بيحصل دا واللي بيتكرر كل يوم وبصور مختلفة، لكن للأسف الصور بتكون أبشع في كل مرة، بصراحة مش هبطل انفخ في قربة مقطوعة لحد ةما نسدها كلنا بإذن الله..
الموضوع ياجماعة.. من كام يوم كدا لقيت خبر من الأخبار اللي مش بتوجع القلب لا دي بتقطعه، الخبر بيقول أن فيه قطة صغيرة مسكينة كل ذنبها إنها غلبانة وجعانة ومافيش بيدها حيلة شافت مطعم في في وسط البلد ناس فيه بتاكل وخارج منه ريحة اكل نفسها فيه القطة منت نفسها بلقمة أو اتنين وقالت ومالو اجرب وادخل يمكن يأكلوني وللاسوء الظروف هيطردوني.. لكن يعيني القطة كان لسه عندها أمل أن البني ادمين لسه عندهم قلب ورحمة أو حتى لسه بني ادمين مش شياطين..
تخيلوا بدل مايأكلوها بواقي الأكل أو حتى يطردوها بره المحل كان مصيرها أن واحد من الشغالين فيه ياخدها ويرميها حرفيا وبقصد في وسط الشارع تحت عجلات العربيات، وتتحول القطة في ثواني لأشلاء..
كل دا بيحصل رغم معارضة ناس لسه عندهم قلب ورحمة ووصل الأمر بيهم للشجار وكمان دخلوا لمدير المطعم اللي للأسف زي المثل مابيقول العن من سيدي إلا ستي كان متخاذل وماأخدش أي إجراء وكان رده هو عمل ايه يعني؟، دي مجرد قطة..
لكن صاحبنا دا وعلى فكرة موقفه اتغير بعد كدا لما لقى ناس لسه ضميرها حي وحلفوا أن الموضوع مش هينتهي ومن خلال السوشيال ميديا طالبوا بمقاطعة مطعمه وفعلا دا حصل وعملوا ريفيوهات عن مطعمه والراجل لو يطول يبوس ايد الرايح والجاي.. ويقال أن العامل دا مرمي في النيابة لكنه هيخرج بعد فترة ودا لعدم وجود قوانين حقيقية لحماية الغلابة دول..
هرجع اقول إن الموقف دا للأسف كل يوم بيتكرر لكن بشكل مختلف والضحية مخلوقات الله الضعيفة اللي لا حول لها ولاقوة والجاني لا عنده ضمير يأنبه وضامن أنه مش هيتحاسب طول ماهو مافيش قانون لتجريم العنف..
وهنروح بعيد ليه؟ طول ما بيحصل دعم للعنف هيفضل موجود في كل صورة، هنستنى ايه طول ماهو مسموح باستيراد سم الاستركنين والطب البيطري هو اللي بيستخدمه ومش ببلاش بالعكس دا بكام مليون دولار سنويا، ومش بس السم دا كمان الرصاص..
عايز اسال سؤال واحد هي الناس دي بتهون عليها الأرواح دي ازاي؟، وسؤال كمان هو ذنب الأرواح دي ايه؟ عشان تقصيرنا احنا ومش عارفين نتعامل معاها بأسلوب إنساني وحضاري؟ قطط وكلاب الشوارع موجودة في كل مكان في العالم لأنها ببساطة مخلوقات لطيفة ربنا خلقها حيوانات مستأنسة يعني بطبيعتها أليفة احنا اللي بنخوفها من قسوتنا وجهلنا في التعامل معاها وللأسف بيتخلق منها بخطة ممنهجة فزاعة لنشر الرعب وفي الآخر بنحملها فشلنا احنا في كيفية التعامل.
أنا عارف أنه موضوع مؤلم نفسيا لكن كان لازم اتكلم فيه لأني عاهدت نفسي أني لازم اكون إيجابي واحاول أن يكون لي دور في التوعية ولو بسيط، وبطلب منكم أنتم كمان أنكم ماتقفوش ساكتين ولا مجرد متفرجين على اللي بيحصل لكن حاولوا تكونوا إيجابين ورافضين العنف اللي بيحصل وتطالبوا بحلول آمنة سوا ليكم وللغلابة دول اللي لاحول لهم ولا قوة.
وفي الآخر أقول لازم نعرف أن الرحمة أحسن من العدالة، والرحمة أهم القيم الدينية والإنسانية، وهي من مكارم الأخلاق، عشان كدا مش هيليق بإنسان أنه جواه قسوة.
عشان كدا بقولك خلوا الرفق في كل اللي حواليك وازرعوا الرحمة في قلبكم وقلوب ولادكم، ولازم تعرفوا أنكم من لحم ودم وشعور ومانتوش جبل ولا حجر، دي امرأة دخلت النار في قطة..
مش كدا ولا اييييييييييييه؟
بقلم
عمرو مرزوق
