زمان قالوا راحة البال عمرها ما تشترى بمال.. ودا حقيقي فمين فينا معندهوش مشاكل؟ مين فينا خالي البال والقلب؟، متهيألي مافيش حد إلا وعنده بدل المشكلة الواحدة مشاكل كتيرة ودا طبيعي لأن في حياتنا لازم تقابلنا كتير من المصاعب والعقبات اللي أحياناً ممكن توصلنا أننا نفقد الأمل والتفاؤل بالحياة.
لكن مش معني كدا أننا نستسلم وتقف حياتنا عشان عقبات الحياة لا وألف لا لأن المفروض نتحرك ومانقفش ونتعلم من أخطائنا ونكمل حياتنا ونعرف نتعامل مع اللي جاي، مين قال إن الحياة سهلة ولا هتديك كل اللي أنت عايزه وتستاهله وعشان كدا لازم تتعود على دا، ولو فكرت بشكل منطقي هتلاقي أن دا الطبيعي.
فاكر لما كنت صغير وفي المدرسة مش كانوا برضه بيعلموك الدرس ويشوفوك فهمته ولا لأ فبيمتحنوك فيه فأما تنجح فيه أو تسقط ما هي الحياة برضه بتعمل كدا بس الأول بتمتحنك عشان تعرف مستواك اللي منه هتعلمك وتديك الدرس اللي هتستفيد منه وتفضل تلعب معاك بالطريقة دي تمتحن وتتعلم، تمتحن وتتعلم والشاطر اللي ما يزهقش ويفضل يتعلم والعلام مش هيخلص هيفضل طول العمر، مش بيقولوا يعيش المعلم ولا يتعلم الشاطر بقى أنه يستفيد من دروس الحياة ويتعلم من كل درس وكل قرصة ودن عشان يعرف يعيش.
لازم نعيشها برضا سواء بقت طالت أو قصرت دي مش بتاعتنا إحنا لكن المهم نقدر نتعامل معاها وبالبلدي كدا ندادي فيها لأن في الآخر مش هنعيش غير حياة واحدة وهنعيشها بطريقة تعاملنا معاها، يعني في إيدينا نختار أما نيأس ونصعبها على نفسنا أو نتفائل بنجاحنا ونهونها على نفسنا ونعديها ولازم نفهم أن اليائس بيضيع من فرص نجاحه ويزود صعوبات حياته والمتفائل هو اللي بيعمل من صعوباته فرص.
والله لو دورنا شوية هنعرف أن الحياة لسه فيها حاجات جديرة بالاهتمام وفيها ناس النظرة في عيونهم بتهون كل الصعاب، الناس دي من حقهم عليك أنك تعافر عشانهم ولحد آخر نفس لأن الاستسلام مش هيدمرك أنت لوحدك لكن هيدمرهم قبلك فطول ما أنت قوي وصلب في تحدي الصعاب هتنجح في الآخر بتأمين حياة سعيدة ليك وليهم.
والله أنا عارف أن اجتياز مصاعب الحياة وضغوطاتها مش سهل خالص لكن في غاية الصعوبة ودائرة مش بتخلص لكن هي دي الحياة والشاطر اللي يعرف ينتصر على المتاعب وبعدين ربنا عارف دا وخلقنا عشان نبقى أقوياء مش هو قال {لَقَدْ خَلَقْنَا الْإِنسَانَ فِي كَبَدٍ} والكبد اللي هو المشقة والمكابدة في تسيير الدنيا.
وزي ما مولانا الشيخ الشعراوي قال المكابدة عشان يبقى فيه فرق بينا وبين الحيوان أن الإنسان يفضل يعافر عشان يعمر الدنيا ودا باللي ربنا اداه له وهو الفكر عشان يحل مشاكله بنفسه وياخد قرار صح بقى أو غلط مش هتفرق لأنه بيملك قراره وهيعرف غلطه لما يغلط، المكابدة في مواجهة ظروف الحياة والتغلب على صعوباتها وتطويعها له بس المهم نعافر مع الدنيا ولا عمرنا نيأس.
وطول ما بينا وبين ربنا عمار هنلاقي القوة، وطول ما أنت قريب من ربنا هيتولد عندك سلام داخلي، وهتلاقي سعادة ورضا وهيمدك ربنا بالصبر والعزيمة عشان تقدر تواجه مصاعب الحياة من غير ملل أو كلل، والله لو فكرت بعقلك ما هتلاقيها صعبة ما هو ربنا مش هيكلفنا إلا باللي نقدر عليه وبرضه مش هيديك حمل تقيل إلا لما يكون عندك كتف يشيل.
مش كدا ولا اييييييييه؟
بقلم
عمرو مرزوق
