أميرة أحمد
لو لسة معرفتيش الصيف دا هتعملي إيه، ولو عندك روح المغامرة وحب التخييم والإنطلاق، جبنالك النهاردة تفاصيل إيفنت هيغير إجازة الصيف بالنسبالك.
محمد المصري شاب من مدينة طنطا ومؤسس فريق “هنشوف بلدنا على العجلة”، أكد لـموقع “كلمتنا” إنه بيطلق أكبر رحلة من القاهرة لدهب للبنات وبس وهتكون على العجل، وكمان هيكون فيه تخييم .
ووضح إنه خصص بنات للتدريب في مدينة طنطا والقاهرة لكل اللي حابب يتعلم ركوب العجل، وإن فيه أكتر من جروب عجل تواصلوا معاه للمشاركة في الرحلة دي.
وعن تخصيص الإيفنت للبنات بس قال محمد “خليته مخصص للبنات لإن لسة فيه أهالي بتخاف على بناتها من ركوب العجل في الطريق العام، فلما يشوفوا إن البنات بتدعم بعضها كمان المجتمع نفسه بيدعمهم أكيد هيغيروا وجهة نظرهم، وتاني حاجة إن طريق دهب ممهد وفيه معالم سياحية رائعة ومزارات”.
وأضاف أنه حاليا بياخد التصريحات الأمنية للحدث، وبيتواصل مع أكتر من جهة منهم الشباب والرياضة علشان يبيحاول يوفر راعي للحدث وميكلفش أي بنت أي مصاريف.
وأخيرا أكد أن اختيار البنات مش عشوائي لكن هيتم بعد عمل ايفينت او اتنين داخل القاهرة علشان يعرف مستواهم.
وحاليا لو حابة تشاركي كل اللي عليكي إنك تتابعي “كلمتنا” علشان تعرفي موعد الانطلاق، أو تتواصلي مع مبادرة “هنشوف بلدنا على العجلة” على الفيس بوك.
