ما كدبش المثل اللي قال “ابنك على ما تربيه”
مافيش حد إلا وبيتكلم عن البنوتة الجميلة هايدي، البنوتة اللي تصرفها جاء عفويًا من القلب، ومن اللي اتزرع جواها وهي صغيرة، لا تعرف يعني إيه ترند ولا نسب مشاهدة، كل اللي تعرفه هو الإحساس وبس، وإيه اللي اتربت عليه واتعلمته في بيتها. شوفوا الحوار الجميل ده وهتعرفوا إيه اللي أقصده.
• إزيك يا هايدي،، كلنا شوفنا الفيديو بتاعك لما رحت تشتري كيس شيبسي وبعدين لقيتي حد برة السوبر ماركت، أدته الـ ٥ جنيه اللي كانت معاك. قوليلي عملتي كده ليه؟
= علشان هو صعب عليا وحسيت إنه مش معاه فلوس.
• بس دي كانت آخر فلوس معاك، والراجل بتاع السوبر ماركت نادى عليك وقالك تاخدي كيس شيبسي تاني، مرضيتش ليه؟
= علشان حسيت إني لو أخدته هيبقى هو اللي عمل كده مش أنا، فقولت “لا شكرًا، مش عاوزة”، وماخدتوش.
• حضرتك والدها؟
= أيوة، دي آخر العنقود عندي.
• حضرتك قولتلها إيه لما شفت الفيديو؟
= حضنتها وبوستتها إنها طيبة، دي حبيبتي اللي بتسأل عليا دايمًا لما أتأخر وبوحشها وبتستنانى أرجع من الشغل. هعوز إيه تاني أكثر من إن مليون واحد شافوا الفيديو وقالولي “ربنا يباركلك فيها”.
• طيب عاوزة إيه بابا يجيبلك علشان التصرف الجميل اللي عملتيه ده؟
= مش عاوزة حاجة والله، أصل أنا مش محرومة من حاجة علشان أقول عاوزة كذا. هو بيجيبلي كل حاجة، ربنا يخليهولي هو وماما.
ده كلام هايدي الجميل وكلام والدها الأجمل، بجد بجد كل إناء ينضح بما فيه.
مش كده ولا ايييييييه؟
بقلم
عمرو مرزوق
