عشان نغير خروجة الكافيه والقهوة والسنيما اللي بنروحها لأفلام الرعب، دلوقتي إنت تقدر تعيش تجربة الرعب لايڤ بنفسك وتبقى واحد من أبطال القصة، بس يا ترى هتعرف تخرج قبل الوقت ولا هتتحبس جوة؟
“كلمتنا” اختارت ليك 4 أماكن مرعبة مليانة إثارة ومغامرات، تروحها إنت وصحابك وتستمعوا بلحظات مليانة رعب وخوف ومتعة في نفس الوقت.
1- Trapped Egypt:
كلم صحابك وجهز نفسك ويلا بينا على أول مكان للرعب وللمغامرة الحقيقية.
ترابد مكان مصمم عشان يعيشك جوة قصة إنت بطلها، وإنا اللي في إيديك الحلول، هما 15 أوضة كل واحدة فيهم ليها حكاية مختلفة، بين الرعب والأكشن وإنت اللي بتختار ناوي تعيش أنهي مغامرة.
خلاص قررت؟
طب يلا بينا نبدأ الحكاية، إنت وصحابك هتتحجزوا في الأوضة اللي اختارتوها، يبقى لازم تبقى قد اختيارك وتبقى جريء كفاية.
الأوضة هتتقفل عليكم وهيبقى قدامك 60 دقيقة إنك تحاول تخرج، طب هنخرج إزاي وهنعمل إيه؟
الأوضة هتبقى مليانة ألغاز لازم تحلها عشان تتنقل للخطوة اللي بعدها، لحد ما تلاقي مفاتيح الهروب اللي تقدر بيها تخرج، وتكون انتصرت وواجهت خوفك أو عشت لحظات من الأكشن الخطيرة اللي هتفضل فاكرها طول عمرك.
طب فين فروع ترابد؟
المواعيد من 12 الظهر ل 9 بليل.
- فرع كايرو فيستيڤال سيتي.
- فرع التجمع الخامس، 253 التسعين الشمالي خلف سوبر ماركت مؤمن وبشار.
- فرع الشيخ زايد.
2- The Horror House:
عمرك فكرت إنك تروح بيت رعب واقعي مش مجرد صورة؟
The Horror House أول بيت رعب حقيقي في مصر والشرق الأوسط، الممر اللي هيوديك على الأوضة المرعبة، في اتجاه واحد، ودة معناه إن مجرد ما خدت قرار الدخول مينفعش ترجع في كلامك أو تخاف، خليك قد اختيارك وكمل.
جمع صحابك عشان تشجعوا بعض، لأن وإنت لسة في أول خطوات الأوضة، هتلاقي الرعب سيطر عليك من كل اتجاه، مش هتعرف تستخبى أو تهرب.
هتعيش قصص رعب مختلفة، وفي كل مرة حكاية جديدة في البيت الملعون، لو بتحب المغامرة والجرأة يبقى المكان دة ليك إنت.
بس يا ترى هتبقى إنت البطل ولا الضحية؟
فين فروع البيت الملعون؟
- فرع ميراج مول طريق السويس، الدور التالت.
المواعيد من 12 الظهر إلى 9 مساءً.
- فرع سيتي ستارز.
المواعيد من 10 الصبح إلى 9 مساءً.
3- Fear Escape Rooms:
عمرك فكرت إن الأفلام اللي بتشوفها في السنيما، قصتها تتحول لواقع وتقدر تعيشها بنفسك وتخوض تفاصيلها؟
دلوقتي Fear Escape Rooms حققتلك الحلم دة، عشان تعيش تجربة حية واقعية، لأكتر فيلمين عربي وأجنبي قصتهم أبهرتنا واتمنينا نكون جزء منها.
أوضة SAW:
أكيد عشت أصعب وأقسى لحظات حياتك وإنت بتتفرج على فيلم SAW، وطرق القتل الشنيعة التي اتعرض لها ضحايا الفيلم.
طب فكرت إنك ممكن تكون واحد منهم في يوم من الأيام؟
السفاح موجود حقيقي في الأوضة دي، هيطبق عليك تجارب حياة وموت من غير رحمة أو شفقة، كل اللي همه إنه ينفذ مهمته اللي توصل للقتل، وتنتهي حياتكم كلكم!
طب إزاي تخرج من الأوضة حي؟
قدامك 60 دقيقة تحاول تهرب منه بكل قوة وسرعة وإلا ممكن متخرجش من الأوضة التاني.
أوضة الفيل الأزرق:
مش كنت عايز تعيش تجربة الفيل الأزرق الجزء التاني؟ يبقى متخافش وواجه الحقيقة وانتصر عليها.
جمع صحابك عشان تفكوا لعنة السحر اللي صابت واحد فيكم، خلال 60 دقيقة وتقتلوا الجن اللي سكن جسمه، وإلا.. هييجي الدور عليكم واحد واحد، ومش هتلاقوا اللي ينقذكم، وهتروحوا ضحية الأشباح.
العنوان: شبين الكوم– المنوفية، تقاطع شارع الجلاء البحري مع شارع باريس.
4- Pyramaze Escape Rooms:
نيجي لرابع قصة وحكاية، عشان تخرج من الأوضة لازم تحل الألغاز اللي تساعدك إن الباب يفتح، طب بس كدة؟
لا طبعًا، Pyramaze Escape Rooms قررت إنها تخلق قصة واقعية عشان تعيشها بكل تفاصيلها، وتكون إنت بطلها الأول والأخير.
هتختار اسم لنفسك وشخصية مختلفة، هتكون جوة اللعبة دي بالشخصية التانية وقصة جديدة.
ومع كل لغز هتحله ومرحلة هتعديها القصة هتوضح أكتر، زي كأنك بتتفرج على فيلم مع الأحداث بتفهم حكايته وسره إيه.
هتمثل دور وتحدد إنت قصته وحكايته وكمان نهايته، وتحل الألغاز في مغامرة فريدة وجديدة كلها رعب وتشويق يعلي الادرينالين في جسمك.
حدد حكايتك وشخصيتك ويلا بينا نحاول الهروب.
العنوان: مدينة نصر، 14 شارع عزت سلامة خلف كنتاكي مصطفى النحاس.
اقرأ أيضًا: تعشق الإثارة ؟.. إليك أكثر 10 أماكن رعبًا حول العالم
