أميرة أحمد
“أعياد الميلاد” مناسبات دايما مميزة ومبهجة، وزمان كان يكفينا تورتة ودستة “حاجة ساقعة” وكاميرا فوتوغرافيا علشان اليوم يكمل، ونستنى نطبع الصور ونحتفظ بيها في ألبوم بسيط.
لكن مع مرور الزمن وظهور الموبايلات اختفت الألبومات المطبوعة، وبقى “كارت الميموري” وبروفايلات “الفيس بوك وانستجرام” هما الألبوم الخاص بكل الشباب تقريبا.
وعلشان “الفيو” هو أهم حاجة حاليا في الصورة، وهو اللي بيعبر عن حيوية صاحبها وروحه الحلوة، فجمعنالك أكتر أماكن شبابية ممكن تاخد فيها صور لعيد ميلادك تكون ذكرى حلوة ومبهجة:
1- Stage ElNile
“ستيج النيل” واحد من أحلى أماكن التصوير على النيل، متجهز بأكتر من “فيو” من الورود والمناظر الطبيعية والمراجيح المعلقة المناسبة لكل الأعمار سواء بنات أو شباب.
الوصول لـ”ستيج النيل” سهل وبسيط لأنه في واحد من أشهر شوارع المنيل “عبد العزيز آل سعود”، وكمان اللوكيشن هناك ينفع لكل الأزواق، فلو عايز عيد ميلادك كلاسيك أو كاجوال أو حتى فاشون فالمكان دا هيلبي كل احتياجاتك.
https://www.facebook.com/StageElNile.ElManial/
https://instagram.com/stageelnile?igshid=5qiyiapa31qd
2- الكوخ
أما الكوخ فهو مكان شبابي لكن من طابع خاص، ودا معمول مخصوص لعشاق الروقان والأنتيكات القديمة الجميلة.
الكوخ فيه أكتر من “لوكيشن للتصوير” أولهم الغابة The jungle ، وهنا الترابيزات و الكراسي كلها من الخشب، مع الزرع و الإضاءة، فكل حاجة تحسسك إنك في كوخ في الغابة فعلا.
تاني لوكيشن هو القعدة القديمة بتاعة أجدادنا، فمفيش تكيفات عشان كدة كانوا بيعتمدوا على الشبابيك الكبيرة و البلكونات، والقعدة بتبقى على كراسي و ترابيزات من الحصير معمولة يدوي و السقف كله خيش.
أما اللوكيشن التالت فهو القعدة العربي، ودي أصغر أوضة، عبارة عن قعدة عربي و ترابيزات نحاس، واللوكيشن الأخير فهو دوار العمدة في منظر يخليك تحس إنك في أفلام الأبيض والأسود.
أكتر حاجة بتميز الكوخ أنه قريب من كل المواصلات فمكانه في وسط البلد ، وتحديدا في شارع السكة متفرع من طلعت حرب.
https://www.facebook.com/alku5.Restaurant/
https://instagram.com/alku5.restaurant?igshid=1pk5wn4ydpkqo
3- قصر البارون
كتير بيفتكر إن الأماكن الأثرية مينفعش تبقى شبابية، لكن قصر البارون كسر القاعدة دي، لإن الخلفيات والتصوير فيه بيبقى ليها مذاق مختلف عند كل الشباب.
ولو عايز تخلي صور عيد ميلادك مختلفة فممكن تدخل جوا المود وتلبس ألوان واستايلات تتماشى مع معمار القصر المختلف.
4- شارع المعز
من أقدم وأشهر أماكن التصوير، وبالرغم من كدا ففي شباب كتير جدا لسة حتى الآن مزارش المكان دا .
التصوير هناك متعة من طابع خاص، وممكن جدا تعمل عيد ميلادك كله هناك، تفطر في الحسين وتقعد على القهاوي القديمة، وبعدين تطلع تتصور في الأماكن الأثرية من معمار القاهرة الفاطمية زي مسجد الحاكم بأمر الله ، وبيت السحيمي ومجمع قلاوون و غيرها كتير من الأماكن الجميلة، وكمان هتطلع اليوم دا بمشتريات حلوة فيها طابع مصري أصيل.
5- حديقة الأسرة
لو كنت من سكان القاهرة الجديدة، وبتعشق الأماكن الطبيعية والخضرة، فصور عيد ميلادك أنسب مكان ليها هي حديقة الأسرة.
المناظر هناك وخصوصا في لحظة الغروب تخليك تاخد صور مختلفة جدا، لكن لازم يكون معاك حد بيفهم كويس جدا في التصوير علشان تطلع بصور مميزة.
