أميرة أحمد
“الشغل مع الدراسة” معضلة كبيرة بتقع فيها كتير من البنات، وبالرغم من إن الأمر بيكون سهل على الشباب لأنهم بيقدروا يشتغلوا لوقت متأخر أيام الدراسة من غير قلق أو خوف، إلا إن البنات بتفضل دايما الشغل بالنهار اللي بيتعارض مع وقت المحاضرات غالبا
وعلشان كدا “كلمتنا” بتقدم ليكي 3 مهن ممكن تبدعي فيهم من غير ما تحتاجي تنزلي من البيت كتير .
1- كاتب محتوى:
من أكتر الوظايف المطلوية حاليا على الشبكات الالكترونية هي “كاتب محتوى”، فكتير من المواقع الالكترونية ووكالات الأنباء ، ومواقع التجارة الإلكترونية، والمواقع الرسمية الخاصة بالشركات وغيرها كتير بتطلب التخصص دا.
طبعا الكتابة محتاجة إن يكون عندك خبرة في الكتاية بدون أخطاء إملائية، ومقدرة على إنك تبحثي بشكل كويس ومعمق على الإنترنت، وتجيبي أفكار مختلفة، وكل دا هتتعلميه بالممارسة وكمان فيه كورسات مخصصة بتدرب اللي حابين يحترفوا كتابة المحتوى.
2- موشن جراف:
لو كنتي من البنات اللي بتحب التصميم وعندك خلفية عن برامج الجرافيك، فتخصص الموش جراف من أفضل التخصصات اللي ممكن تبدعي فيها، ودا المجال المختص بتحريك الرسوم ودمج الأصوات عليها، ودا الاتجاه اللي كل الإعلانات بتتجه حاليا، ومفيش شركة ملهاش فيديوهات موشن جراف.
الموضوع هيتطلب منك جهاز لاب توب حديث، وممكن جدا تتعلمي برامج الموشن لوحك وتتمرني وتبدأي تعملي نماذج وتعرضيها على مواقع زي “خمسات” مثلا.
3- إدارة الصفحات الالكترونية:
لو عندك وقت فراغ كبير بعد المحاضرات وتقدري تستخدمي مواقع السوشيال ميديا لفترة طويلة، فالمئات من الصفحات التجارية والمواقع بتحتاج مديرين لصفحاتهم على الفيس بوك والانستجرام، وخصوصا صفحات الملابس، والاكسسوارات لان معظم عملائهم بنات.
المهنة دي هتبقى ممتعة لو انتي حد بيحب السوشيال عامة والرد على المسدجات، لكنها مرهقة جدا لأي حد معندوش صبر أو ملكة في الكلام.
