كل سنة والجميع بخير.. فاضل أيام قليلة على بداية سنة جديدة تطل علينا من شباك الأمل.. ونتمنى كلنا أنها تكون شايلة لينا كلنا الخير والبركة وتعوضنا عن كل الأيام والتجارب القاسية اللي عاشناها في حياتنا السنين اللي فاتت إن شاء الله.
سنة جديد هتهل علينا وهيستقبلها كل واحد بأمنيات وأحلام بيتمنى يحققها ولما نقول سنة جديدة هيبقى قصدنا أمل جديد بمستقبل كله نجاح وتفاؤل وإصرار بأنك تطوي كل ألم وفشل مر في حياتك وتقوم محولهم في السنة الجديدة لنجاح، عشان كدا إياك تحزن على ضياع حاجة كنت فاكر أنها كانت هتسعدك مش يمكن كان العكس هو اللي صح وكانت هتبقى سبب لتعاستك؟..
وخلي بالك لازم يكون عندك الوعي الكافي أنك تشوف الحاجة اللي نقصاك وتسأل نفسك ايه اللي عاوزه بس لسه ماملكتهوش؟ مؤكد دا هيزيد من نسبة إدراكك ويعزز مهاراتك و تبتدي بخطوة عشان تكون متميز بشرط يكون متفق مع مبادئك..
عشان كدا عايزك تحدد الحاجات والعادات الحلوة اللي نفسك تكتسبها دا أولا وثانيا حدد أنت عايز ايه؟، وشايف نفسك فين؟ وعايز توصل لفين؟، إياك تزهق أو تيأس أو تستصعب المشوار، خلي بالك أن مشوار الألف ميل بيبدأ بخطوة واحدة فياريت تبتديها وأنت كلك أمل وأنت عارف في قرارة نفسك أنك هتوصل إن شاء الله للي عايزه..
ماهي الدنيا مراية وريها توريك، يعني لو وريتها صورتك وأنت راضي وكلك أمل هتوريك الرضا وتفتح في وشك أبواب الأمل ولو كان عملك فيها خير هينرد عليك بالخير والعكس صحيح، وعشان تغير حياتك في السنة الجديدة حدد أهدافك اللي بتعيش عشانها وحط خطة امشي عليها في السنة الجديدة وكمان اتخلص من الإحباط وإياك تبص وراك يعني ماتخليش أزمة توقفك وإياك تفكر باللي يخليك تحزن وركز بس على تحقيق أهدافك..
عشان كدا اغتنم وقتك وإياك تضيعه وخليك فاكر أن الوقت لو فات مش هيتعوض وخطط بحكمة للسنة الجديدة بعيد عن أحلام اليقظة وخليك إيجابي وابعد عن الاحباط، وكمان لازم تخلي عندك دايما الشعور بالامتنان والشكر لله على نعمه الكثيرة..
واكتسب عادات جديدة مفيدة واتخلص من عاداتك السيئة ونظم وقتك واتعلم ازاي تديره صح، وابعد عن اختلاق الأعذار لنفسك أو لعب دور الضحية، لازم تعرف أن الشاطر هو اللي يعرف ازاي يقدر يسيطر على أفعاله ويقدر على مواجهة تحديات الحياة وجهاً لوجه.
ودايما خلي عندك أهداف وطموحات كبيرة عشان بالعمل الجاد هتقدر أنك تحققها، ودايما خليك متفائل واتاكد اللي ماقدرتش عليه امبارح هتقدر عليه النهاردة اللي هيكون صعب النهاردة هيكون بكرة سهل وخلي عندك أمل..
واسمع كلام عمنا صلاح جاهين لما قال:
حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهي
مش انتهت أحزان من قبلها؟
عجبي !
مش كدا ولا اييييييييه؟
بقلم
عمرو مرزوق
