لما سمعت الست وهي بتقول “الحب كدا”، قلت فرصة أعلمكم يعني إيه عيد حب. الحب مش عشق وهدايا وقلوب حمراء ودباديب.
الحب أوسع وأجمل من كدا بكتير، مش محصور في راجل وست ولا حكاية غرام. عارفين يعني إيه حب؟ هو اللي بيبدأ من جوه الإنسان، وإنك تصحى الصبح حابب الحياة. يعني تحب شغلك وأهلك وبلدك وتحمد ربك على رزقه. والأهم إنك تحب نفسك وتسامحها وتخليها في سلام، وتحب الخير لغيرك وتفرح لفرحتهم وتطبطب على وجعهم.
الحب مش كلام حلو يتقال، لأ، دا فعل وسلوك وأسلوب. فلما تمد إيدك لحد محتاج، لما تقول كلمة طيبة، لما تعذر بدل ما تهاجم، كل دا حب.
هو ليه إحنا بنستنى مناسبة تذكرنا إن لسه فينا خير ولسه نقدر نحب ونفرح؟ ماتيجوا نتعلم إزاي نحب، نتعلم نشوف النور وسط العتمة، نتعلم ما نشوفش غير الحلو الموجود في الناس، ونقدر النعمة اللي في إيدينا قبل ما تضيع.
ونتعلم إزاي نقدر نسامح لأن الكره ما بيوجعش غير صاحبه. اللي هيعرف يحب هيعرف إزاي يعيش، واللي هيعيش من غير حب مش هيعرف يشوف الدنيا. لأن الحب مش رفاهية، دا أمان وسكينة في زمن كله غدر ودوشة.
ولما نتعلم نحب صح، هنلاقي السلام اللي بندور عليه. وساعتها بس هنفهم معنى الجملة اللي عمرها ما هتموت: “اتعلموا الحب وازاي تحبوا”.
مش كدا ولا اييييييييه؟
بقلم:
عمرو مرزوق
