مرحب شهر الصوم مرحب لياليك عادت بأمان.. كل سنه وأنتم طيبين وبخير ويعيد دايما عليكم شهرنا الكريم بالخير والبركات.. الناس وشوشها مش هي اللي بنبقى متعودين عليها في استقبال شهر رمضان، يمكن عشان الارتفاع الجنوني في الأسعار اللي الكل بيشتكي ويعاني منه لأن الكل عايش فيه ومأثر عليه.
لكن شعبنا طيب والناس بتستحمل وتحاول تتعايش مع اللي بيحصل وتقدم حلول لنفسها لعل وعسى تقدر تعيش، ومع المعافرة دي بتنسى أو بمعنى أصح بتتناسى حاجات كتيرة على سبيل التوفير وبيمشي الحال صحيح ماشي بعكاز لكن اهو ماشي وخلاص واهو بنحاول نعدي الأيام دي ونقول يارب.
زمان قالوا اللي ميشوفش من الغربال يبقى أعمى
ومتهيألي اللي احنا فيه دلوقتي مش مسألة شوفان وبس لا دا واقع كلنا عايشين فيه وبنعاني منه كلنا.. ومع دخول الشهر الكريم الكل بيستناه بفرح لأنه ضيف خفيف بيجي يزورنا مره في السنة بس شهر ربنا فرضه علينا عشان نحس ببعض ونحس بمعاناة اللي مش قادر مننا ونحاول نمد أيدنا له ونساعده.
لكن بصراحة اللي بيحصل السنة دي حاجة غريبة فمع الارتفاع الجنوني اللي في الأسعار بقت الشكوى منه على لسان الكل، صحيح باختلاف نوع الشكوى، ناس ىتشتكي من عدم مقدراتها على توفير احتياجاتها الأساسية وبتضرب أخماس في أسداس ازاي هتقدر تصمد، وناس بتشتكي من ارتفاع الأسعار في المجمل.
وكتير من الناس كانت متعودة قبل دخول شهر رمضان أنها تعمل عدد من الكراتين كدا وتجمع في كل كرتونة شوية حاجات مهمة لأي بيت مثلا زي الزيت، السكر، الرز، وسمن وبلح وبقوليات وغيرها من الحاجات، أوقات كانت بتضم كيس لحمة أو فرخة هي مش مقياس ثابت لأنها بتختلف من شخص للتاني حسب مقدرته المادية، المهم الكرتونة دي كانت بتفرج على كتير من الأسر وكانت بتستناها.
اللي يوجع القلب السنة دي أن مع الغلا اللي حصل لكل السلع وغلو المعيشة اللي بقينا فيها الكراتين عددها قل أو محتويات الكرتونة الواحدة قلت ودا اللي عمله كتير مننا، وبرضه اقول على الناس اللي عملت كدا ربنا يكرمهم اهو على الأقل حاولوا أنهم يساعدوا، الناس دي في عز أزمتها حاولت وعملت زي ما ربنا قال لأنهم أنفقوا في السراء والضراء.
لكن بيفضل سؤال فين باقي الناس اللي ماحاولتش تساعد؟، فين الناس اللي بتشتكي من ارتفاع أسعار المكسرات والحلويات وغيرها من الحاجات المستفزة بالنسبة للناس اللي مش لاقية تاكل أساسا، الناس دي بقولهم والنبي يا أخي أنت وهو بدل مايبقى شغلك الشاغل هتجيب بكام كيلو الكاجو والفسدق السنة دي وهتجيب كام كيلو والكنافة اللي هتجيبها باللوتس ولا بالمانجا من عند مين أبو سعر أغلى من اللي صاحبك اللي هيجيبها من فلان ولا علان..
ياريت نفتكر الناس اللي مش لاقية تاكل وقلل شوية من الحاجات دي، أنا مش بقولك ماتجيبش لاسمح الله، ولكن بقول لك افتكر غيرك ووازن الأمور وترسم البسمة والفرحة على وش حد محتاج وصدقني لو هو محتاج مساعدة فأنت محتاج أكتر منه، محتاج دعوة حلوة منه تخرج من قلبه على باب السما المفتوح، محتاج رضا من رب كريم لعبده المحسن..
مش كدا ولا اييييييييييييه؟
وفي الآخر اقول رسولنا الكريم قال (من نفس عن مؤمن كربة من كرب الدنيا نفس الله عنه كربة من كرب يوم القيامة ومن يسر على معسر يسر الله عليه في الدنيا والآخرة)..
والنبي يا جماعة كل واحد مننا يعمل اللي يقدر عليه وصدقوني احنا اللي هنبقى كسبانين.
مش كدا ولا اييييييييييييه؟
بقلم
عمرو مرزوق
